Mizoram Super League Tuikual South an hniam lo

Ningani zan dar 8:00-ah Tuikual South leh final lut chiang sa Zarkawt BCA te'n Mizoram Super League match hmuhnawm tak an khel a, Tuikual South in 68-56 in hnehna an chang.

Inkhel ṭan tir lam aṭangin team pahnih an incho tawk viau a, tlawm zawk nih an tum lo ve ve. Tuikual South in 1st quarter-ah point 19 rawn score in Vanchuangpuia leh F.Zodinthara te an rawn langsar lehnghal a, Zarkawt BCA in point 20 rawn score in David Lalruatfela a langsar fal hle. 1st quarter-ah team pahnih inhnehtawk viau mah se 2nd quarter hnu lamah erawh Tuikual South rorelna a ni a, chak phu zawk nichungin Tuikual South in hnehna an chang ta a ni.

Hawla Indoor stadium-a inkhelah hian Tuikual South tan beisei lawk ang ngeiin Vanchuangpuia leh captain F.Zodinthara te che vel a hmuhnawm lehpek hle. Chp-a hian a team tan point 14 score in rebounds 11 a la thei a ni. Tuikual forward Dina'n MSL-a hming langsar pawl a nih chhan rawn tilangin a team tan a thawhhlawk hle a, point 18 score in rebounds 11 zet a la thei a ni.

Zarkawt BCA tan Armed Veng tlangval David Lalruatfela a che ṭha a, ani hian a team tan point 20 score in rebounds pariat lai a la thei a ni.

MSL khelh ṭan a nih hma khan Tuikual South in Play-off aṭanga MSL inhlangkai mah nise zuam ngawt chi an nih loh thu an sawi a, an sawi dik. Tuikual South hian MSL match vawi sawm khelh tur awmah vawi sawm khelin an khingpui te vawi nga hnehin vawi nga tho an tlawm a, an khingpui an hneh loh ṭum tam zawkah hian an hneh loh hrim hrim vang lam ai mahin an fimkhur tawk loh vanga a tawp lama an chetsual a tam zawk. Season tharah hei hi an insiamṭhatna tur a ni ang. Playoff aṭanga MSL khel nichunga a sang ber pathumnaa tel phak erawh result chhia a ni lo.

Zarkawt BCA hi MSL ṭan a nih hma khan an langsar lem lo a, MSL ṭan a nih aṭang chiahin court-ah erawh team langsar ber pawl an ni nghal. Anni hian vawi sawm khelhah an khingpuite vawi sarih hnehin vawi thum an tlawm thung a, final-ah vawihnih an hneh loh tawh Khatla TBL an tum dawn a, champion tur chuan an inbuatsaih ngawrh lehzual a ngai ngei ang.