Mayweather - Pacquiao ticket hralh zo rang
May 2-a Floyd Mayweather leh Manny Pacquiao te inhnek turin boruak a nei lian zel a, Ningani khan mipui vantlang tana ticket pekchhuah zat 1000 chu MGM Grand website leh Ticketmaster kaltlanga zawrhchhuah niin minute reilote chhungin hralh zawh nghal vek a ni.
Ticket hi a man tlawm ber £1,000 (Rs. 95,798) a zawrhchhuah niin a man to ber hi £5,000 (Rs. 478,993) a zawrhchhuah a ni thung. Official ticket zawng zawng hralh zawh a nih rual hian website hrang hrangah zawrhchhawn leh nghal a ni a, heng website ho hian ticket hi £94,000 (Rs. 90,35,148) te'n an zuarchhuak!
Boxer ropui pahnih inhnekna tur hmun MGM Grand, Las Vegas-ah hian mipui 16,500 an leng a, mipui vantlang tana zawrhchhuah ticket 1000 bakah hian ticket 15,500 chu boxer, sponsor te leh promoter te tan bik dah hran a ni.
Kum 38-a upa American boxer Mayweather leh kum 36-a upa Filipino boxer Pacquiao te pahnih inhnek turah hian pound maktaduai 162 zet chu hmuhchhuah in beisei a ni.