Liverpool kaihruai turin kei aia ṭha an awm lo - Rodgers
Liverpool manager Brendan Rodgers chuan tun season-ah beisei angin a team chet ṭhat pui lo mah se Reds kaihruai tur chuan a ṭhat ber thu sawiin season tharah Anfield-a a cham leh ngei a rin thu a sawi.
Kum 1950 hnua season thum chhung Liverpool trophy chawi pui miah lo hmasa ber Rodgers chuan, " Nakumah manager ka nih leh ka inrin leh rin loh chungchang min zawt a nih chuan ka inrin takzet thu in ka chhang ang che u. Liverpool kaihruai turin kei aia ṭha an awm ka hre lo. Chu chu ka hmuh dan diktak a ni," tiin a la pawr ham ham hle.
Kum 42-a upa Rodgers chuan, "Thla thum liamta kha chuan coach ṭha ka nihzia sawiin min fak luai luai a, tunhnaiah game pawimawh ṭhenkhatah ka team ka chakpui zo lo zauh a, min sawisel leh nghal luai luai. Hei hi chu football kalphung ve reng a ni. Club ropui tak ka enkawl avangin vawikhat chak loh pawh hian chanchinthar a siam nasa em em ṭhin a ni," a ti.
Tunhnaiah Liverpool leh Borussia Dortmund manager Jurgen Klopp sawizawm chungchang sawilangin Rodgers chuan, "Hetiang thu lengvak hi chu a awm reng ang. He club hi club ropui tak a ni miau alawm. Coach a rawih ka nih hma pawh khan mihrang hrang hming a lang nuaih a nih kha ," tiin season tharah Liverpool la enkawl leh a inrin thu a sawi.
Jordan Ibe leh Raheem Sterling sawi lang telin Rodgers chuan Liverpool rawlthar duhawm pahnih hi contract thar ziah pui tuma an dawr mek thu a sawi bawk.
Season tharah players ṭha tak tak lakluh an tum thu sawilang nghalin Rodgers chuan, "Nikum khan sum tam tak sengin players kan lalut ṭeuh a, hmasawn kan ngaihna nia kan hriat lai te thuam chak tura lakluh an ni. Tun season-ah hian kan khel chhe hran lo, cup pahnihah semi-final kan lut a, Premier League-ah pangana kan ni mek bawk. Hei aia ṭha a khelchhuak thei kan ni tih erawh ka pawm a, nipui transfer-ah players ṭha zawk kan lakluh belh leh ang," tiin season thar atan sum an insen nual tur thu a sawi bawk.
Zanin dar 7:30-ah Liverpool hian khualmualah West Bromwich Albion an hmachhawn ang.