I League Second Divsion PIFA laka point li hlohtu Chanmari FC
Nimin khan Chanmari FC-in table mawngphaha awm PIFA an draw hram a, he result avang hian MPL2 champion I League kal kawng a khirh lehzual khawp ang. Chanmari hian PIFA hi Siliguri-ah an draw tawh bawk avangin MPL club hian team ṭha lo zawka ngaih PIFA lakah hian point li lai an hloh.
Golaghat Stadium-a inkhelah PIFA-in goal an khung hmasa a, Sandesh Gadkari-a'n minute 20-na lekah goal hma hruai a khung. Hun tawp hma minute 14 a la awm tihin Chanmari FC-in an sut chauh a, goal khungtu chu Malsawmfela a ni. 1-1 in inkhel a tawp.
Kenkre hnehtu Chanmari FC starting eleven aṭangin H. Vanlalthlanga'n player pakhat chiah a ti danglam a, defender Lalhriatrenga (Achia) aiah Joseph Lalnunpuia a lut thung.
Chanmari FC hi goal hmaah an vanduai nghal a, corner aṭanga ball kal chu defender Lalruatthara'n a tlawh over nghal. PIFA an buai bik lo a, Sandesh Gandkari hmanga goal an khung hnuah Chanmari FC-in inrintawkna an hloh.
Field nal deuh vangin Chanmari-in an game pangngai an khel thei lo a, Sawmfela'n a chance ṭha ṭum hnih neih chu keeper pass nan a hmang. Talent nei ṭha Sawmfela goal hmaah a vanduai reng lo a, minute 76-naah Chanmari siphurh a sut.
Chanmari hian chak ngei tumin Nigerian forward Joel aiah Fela Zote luh tir mah se Chanmari-in goal dang an khung belh lo.
Chanmari FC coach H. Vanlalthlanga chuan, "Ruahsur vangin field a nem a, player-te ball pet a dik theih loh avangin khelh dan phung pangngaiin kan khel thei lo. Training mumal kan neih theih chuan ṭha takin kan khel leh thei ang," tiin a sawi.
I League chungchang sawiin Thlanga chuan, "Game nga khelh tur a la awm alawm, vawi khat draw vanga buai tur kan ni lo. Theihtawp kan chhuah chhunzawm zel ang," tiin a sawi.
Tute nge Khel?
Goalkeeper: Lalruatpuia
Defenders: Ricky Lallawmawma, Lalrinchhana (C), Lalruatthara, Joseph Lalnunpuia
Midfielder: Rochhingpuia, Laldingngheta, F. Lalrinpuia, Malsawmfela, Lalbiakhlua
Forward: Joel Sunday