Koeman-a'n a naute insawrbing turin a fuih

Southampton manager Ronald Koeman chuan Ningani khan Saints player te a hranpa a meeting pawimawh neihpuiin an inkhelah chauh insawrbing turin a fuih a, season tawp lama transfer thuthang awm ṭhin chu an rilru lak peng tir lo turin a hrilh a ni. Koeman-a'n a nau te a kohkhawm chhan ber hi tunhnaia a midfielder pawimawh Victor Wanyama chu Arsenal in an rim anga national newspaper ṭhenkhatin an tarlan vang a ni.

Wanyama chuan Arsenal zawm tur anga an sawina hi pha tawhin Koeman pawn national newspaper ho thuchhuah chuan behchhan mumal a neih loh thu a lo sawi tawh a ni.

Dutch manager Koeman chuan, "Victor chuan Arsenal zawm tur anga an sawi hi thu lawilo mai mai a nih thu min hrilh tawh a, a thusawi hi ka ring bawk a ni. Ka player-te nen kan titi ho tawh a, season tawp lamah hi chuan player te hmakhua tur chungchangah thuthang a tam ṭhin em em a, chu chuan an game-ah nghawng a neih phah ka hlau a ni. Kan hmabak match nga khelh tur la awmah hian kan rilru kan dah a ngai. Hei hi a pawimawh ber chu a ni a, player-te nen kan inhmuhkhawmnaa ka thusawi pawh a ni. Season bul ṭha taka kan ṭan ang khan a tawp lam pawh hi ṭha taka khar kan duh a ni," a ti.

Season hmasa tawp lam khan Saints ho hi an player pawimawh ṭhiau Adam Lallana, Luke Shaw, Dejan Lovren, Calum Chambers leh Rickie Lambert te transfer thuthang in a lo tibuai tawh a, kha buaina kha a thlen nawn loh nan Southampton hruaitu te hian hma an la nawn a ni.