Europa League Champion lai Sevilla in semi final an lut

Ningani zan khan Europa League quarter final thawhhnihna khelh a ni a, semi-final khel tur pali a hriat chian ta.

Semi final lut zingah champion lai Sevilla bakah Rafael Benitez-a enkawl Napoli te chu a langsar pawl an ni.

Russia club aia chungnung zawk Spanish Club

Russia-ah Spanish club Sevilla an zinchhuak a, khualmualah Zenit St Petersburg nen an inkhel a, mikhual team hian inkhel ṭan aṭanga minute riat na lekah Carlos Bacca hmangin goal hmahruai khung mah se Salomon Rondon leh Hulk te'n Russian Premier League hmahruaitu tan an si phurh an rawn sut a, rei tak chhung 2-1 in mualneitu lamin hma an hruai. Mahse, hun tawp nan minute nga chiah a awm tawh tihin substitute Kevin Gameiro chuan Sevilla tan goal khat a rawn khung ve leh a, Ramon Sanchez Pizjuan-ah 2-1 a an lo chak tawh avangin inkhel pahnih belhkhawmah 4-3 in Sevilla an chungnung zawk a, Europa League semi-final an lut ta a ni.

Napoli pawh an chak e

Italian club Napoli pawhin semi-final an lut a, an khelmualah German club Wolfsburg nen 2-2 in inhnehtawk mah se first leg-ah 4-1 laia khualmuala an lo va hneh tawh avangin inkhel pahnih belhkhawmah 6-3 in chak zawkah an ṭang ta a ni. Napoli hian Jose Callejon leh Dries Mertens te goal khung hmangin hma hruai zet mah se Timm Klose leh Ivan Perisic te chuan an mualpho lutuk tur venhim nan German club tan hian an siphurh an sut a ni.

Italian club dang Fiorentina pawhin Mario Gomez leh Juan Vargas te goal thun hmangin 2-0 in an mikhual Ukrainian club Dynamo Kiev chu an hneh a, inkhel hmasa nena belhkhawmin 3-1 in a tlang zawkah an ṭang ta a ni.

Dynamo Kiev an chak zawh loh laiin Ukrainian club dang Dnipro erawh an chak a, substitute Yevhen Shakhov chuan he inkhela goal awm chhun khungin Belgian club Club Brugge chu 1-0 in an hneh a, a tlang zawkah an ṭang ta a ni.