I League U19-ah Chanmari an chak lo

Chanmari FC U19-in an game hmasa berah Mohun Bagan U19 an draw a, Ningani zan khan United SC U19 lakah 2-0 in an tlawm.

I League U19 khelh mekah Chanmari FC U19 hi pasarihnaah an awm mek a, vawiin tlai dar 5:15 hian Hindustan U19 nen an khel leh ang a; zan dar 8:15-ah Kolkata club pahnih Mohun Bagan leh United SC te an inhmachhawn bawk ang.

DSK Ground, Pune-a inkhelah Chan­mari FC U19-in goal an chhuah hma a, an siphurh sut tumin na takin nawr let mah se goal an hlawhchhuak zo lo. Match hmasa ber hrem vanga khel thei lo K. Lalchhanhima'n crossbar a pet per a, Lal­rinsanga'n freekick aṭangin goal a khung teuh viau bawk. Hun tawp thlengin Chanmari U19 te'n an nawr a, Ṭhasiama'n keeper chauh a hmachawn hnuah a khung lo bawk.

Injury time-ah Chanmari-in freekick an hmu a, goal khung tuma an chhuah vek avangin United SC nawr let an dawl zo lo a, goal hnihna an chhuah a, hun a tawp zui bawk.

Chanmari U19 coach Samuel Lalrinzuala Sailo chuan, "Khel ṭha zawk ni chunga chak lo zawk nih chu a hreawm duh khawp mai. Match hnih khelh tawhah chak result la hlawhchhuak lo mah ila, champion tumin kan khel zel ang," tiin a sawi.