Aizawl FC-in I League kawng an zawh

Golaghat, Assam-ah Aizawl FC-in result duhawm an hlawhchhuak ta. Nimin khan PTC Stadium, Dergaon-ah Aizawl FC-in Delhi club Hindustan FC chu 5-0 in an sawp. MPL3 champion hian point 22 hmuin an hmahruaina dinhmun an sawhnghet a, United SC hnehtu Lonestar Kashmir-in point 19 hmuin an dawt.

Aizawl FC coach K. Malsawmkima'n United SC an draw ṭuma tlar hnung ngai bawk a rawn hmang a, midfield-ah captain David Lalrinmuana leh H. Lalbiakthanga aiah Reuben Zosangpuia leh B. Zoramthara an lut a, forward-ah Justice Morgan aiah Michael Lalremruata a lut bawk.

Aizawl FC hian Siliguri-ah Hindustan 3-2 in an hneh hram a, Golaghat-ah erawh Mala enkawl Aizawl FC hian an chungnung zia lantirin Liberian forward Alfred-a hattrick leh Michael-a goal hnih hmangin an chak chiang hle.

Khatla Veng tlangval Michael hi tun inelnaah a vawi hnih inlanna chauh ni mah se goal hmaah a hriam hle. Minute 30-naah goal hmahruai a tauh lut a, ṭan aṭanga minute ngana lekah fing taka MS-a ball pek chu goal-ah a chantir leh bawk. Hemi hnu hian Liberian forward a rawn inlar a, Alfred hian minute 56-naah a goal hmasa ber a khung a, hattrick siam nan minute kaw dang chiah a mamawh.

Aizawl FC coach Mala chuan, "Phase 2 ṭannaah beisei ang result hlawhchhuak lo mah ila Hindustan hmaah result duhthusam kan nei a, kan lawm takzet. I League khelh ngei kan tum a, kan hmabak hi a la awlsam lo. Mizo mipuite min ṭawngṭaipui zel turin kan ngen a ni," a ti.

Nimin inkhelah Lone­star-in United SC 3-2 a an hneh avangin Chanmari FC chungah an inhlangkai a, Phase 2-a Lonestar hnehtu Mohammedan SC-in Kenkre 4-3 a hnehin I League khelh beiseina an nei chhunzawm zel bawk.

Round 10 hi Thawhṭanniah khelh a ni dawn a, Chanmari FC leh Mohammedan SC inkhel tur hi a ngaihnawm dawn. Aizawl FC leh PIFA te inhmachhawn tur bakah Hindustan leh Lonestar inkhel tur hi a pawimawh ang.

Tute nge khel?
Goalkeeper: Zothanmawia
Defenders: Immanuel HS Lalṭhazuala (c), Lalramchullova, Toky Zomuanpuia, Lalrozama.
Midfielders: Reuben Zosangpuia, R. Malsawmtluanga, B. Zoramthara, William Lalnunfela, Alfred Kemah Jaryan
Forward: Michael Lalremruata