Dr TAo Football Mizoram Vs Manipur

Vawiin tlai dar 4:30 hian Mizoramin DSA Ground, Sil­charah Manipur an hmachhawn ang a, point an hlawhchhuah theih chuan semifinal an lut ang. Dr TAo Football champion lai Mizoram khingpui tur Manipur hian semifinal an lut chiang tawh. Zan dar 7:30-ah Meghalaya leh Tripura an inkhel leh bawk ang.

Mizoram hian Ningani tlaiah Tripura hneh mah se an match hmasa bera Meghalaya an draw avangin an dinhmun a la chiang lo. 2014 Dr TAo finalist-te hian semifinal hmunruak pakhat an inchuh ang.

Mizoram hian vawiina Manipur an hneh theih chuan Group 2 hmahruaitu an ni dawn a, an draw erawh chuan pahnihna nichungin semifinal an lut ang. An chak loh a, Meghalaya an chak si chuan goal difference nei ṭha zawk chu semifinal lut tur an ni.

Meghalaya hi Manipur lakah 2-5 in an tlawm a, an goal difference hi -3 a ni mek. Mizoram goal difference hi +2 a ni a, innghahna tlak a awm lo. Meghalaya tum tur Tripura hi tla tawh an ni a, goal ṭhahnem tak a lut thei tlat.

Mizoram coach HC Zar­zoliana chuan, "Player inhliam leh hrem an awm lo a, kan ṭhat theih dan berin kan lut leh thei tawh ang. Semifinal thleng lo a tlak hi kan duh lo," tiin Vanglaini palai a hrilh.

Manipur hian kum 2014 khan Mizoram hneh loin Santosh Trophy final round an thleng zo lo a, Dr TAo Football-ah Meghalaya hneh loin semifinal-ah an tla bawk. Tun ṭumah erawh Meghalaya lakah phuba an la tawh a, forward-ah Shillong Lajong player hlui Seikhohau Tuboi te an kawl avangin Mizoram hi stage sang zawka an hmachhawn loh nan groupstage pelh tir loh hi an duh ngei ang.