Champions League semi-final a hmuhnawm dawn
Nimin tlai khan Champions League semi-final intum tur chu Nyon, Switzerland-ah ṭhumvawr hmangin pawh a ni a, German champion Bayern Munich manager Pep Guardiola chuan a team enkawl tawh ṭhin Barcelona a hmachhawn dawn. Bayern leh Barca inhmachhawn tur hian mipui ngaihven a hlawh nghal hle. Guardiola hian Spanish club kum li a enkawl chhungin 2009 leh 2011 khan Champions League-ah a lo champion pui tawh a, manager a nih hnuin trophy 13 lai a chawi bawk. Kum 2008 -2012 Barca a enkawl chhung khan Champions League semi-final vawi li a luhpui thei a, Bayern hi vawi hnih a luhpui na a ni ta bawk.
Semi-final dangah Italian champion Juventus leh Champions League champion lai Real Madrid te an inkhel dawn bawk a, Real manager Carlo Ancelotti hian kum 1999-2001 chhung khan Italian club Juventus hi a lo enkawl tawh nghe nghe.
Champions League semi final first leg hi May 5-ah khelh a ni anga, second leg May 6-ah khelh a ni thung ang.
Champions League semi-final inkhel tur draw neih a nih rual hian Europa League semi final inkhel tur pawh ṭhumvawr hmanga pawh a ni a, Rafael Benitez a team Napoli leh Dnipro te an intum dawn a, semi-final lehlamah champion lai Sevilla leh Italian club Fiorentina te an inkhel bawk ang.