Premier League Thlirlawkna Arsenal-in Chelsea chelh an tum dawn
Premier League match ruk chauh khelh hmabak an nei tawh a, Chelsea-in point 76 hmuin an mahni hnaih bertu Arsenal lakah point 10-in hma an hruai fal mek. Pathianni zan dar 8:30 hian Emirates Stadium-ah team pahnihte hi an inkhel dawn a, Chelsea hi an chak emaw draw emaw anih chuan champion a puan ngam an ni tawh ang.
Tun season ṭan tirh 2014 October khan Chelsea leh Arsenal te hi Stamford Bridg-ah an lo inkhel tawh a, Eden Hazard leh Diego Costa goal khat ve ve thun hmangin 2-0 in Chelsea an chak.
Team ṭha pahnih
Team pahnihte hi an boruak ṭhat vanglai ve ve a ni. Chelsea hi Manchester United hneh hlim hlawl an ni a, an khingpui tur Arsenal hi FA Cup final lut hlim an nih bakah Premier League a match riat chhung hnehna chang zawn thei an nih avangin EPL ngaina tu te tan chuan en hmaih chi a ni lo ang.
Chelsea hian sum tam tak sengin player man to leh ṭha an leikhawm ṭhin. Atletico Madrid aṭanga an lei striker Diego Costa leh midfielder Eden Hazard te hi an chakna hnar pawimawh niin PFA player of the year ni thei tura hming chhawpchhuah paruk zingah an tel. Sum hman hreh ṭhin Wenger-a'n sum hman a hreh lutuk tawh bik lo. Season ṭan dawn khan Barcelona aṭangin Alexis Sanchez a lalut a, a tisual lo.
Ani pawh hi PFA Player of the year dawng thei tur a thlan chhuah zingah a tel phak.
Intawn vawi 13 na
An inkhelh tawhna thlir letin Arsenal manager Arsene Wenger hian Chelsea manager Jose Mourinho hi a ngam lo hle a, tunhnai match 12 an inhmachhawnah a team te hnehna a chanpui zo lo vek a ni. He a record duhawm lo tak hi Wenger hian siam ṭhat a duh a nih chuan an intawn vawi 13 na hi atan hun ṭha a ni ang.
Fabregas a kir dawn
Spanish midfielder Cesc Fabregas hian kum 16 chauh a nihlai kum 2003 khan Barcelona aṭangin Arsenal a zawm a, Wengera hnuaiah in tuaihriam chhoin Gunners tan hian match 212 khelin goal 35 a khung hman. A thiam leh fin em avangin Wenger-a'n captain atan a ruat a, mahse kum 2011 khan a naupanlaia a inzirna Barca lamah bawk a kir leh a ni.
Tun season ṭan dawn khan a club hlui Arsenal-ah a kir leh dawn nia sawi ni mah se, an hmehma leh elpui Chelsea a zawm ta zawk a, hei hi Arsenal hmangaihtu ten an hrethiam lo hle. Pathianni zan khain Fabregas-a'n lawm a hlawh vak lo a nih pawhin a mak lo ang. Amaherawhchu Gunner boss chuan Cesc hi Arsenal tana a thiltih tawh te thlirlet chuan zah a phu a ni a ti ve thung.
Result engtin nge ni ang?
Arsenal hi an chak a nih chuan an inthlauhna hi point sarihah a tlahniam dawn a, match nga khelh tur an la neih dawn avangin point 15 hmuh theih ala ni dawn. Champion theihna chance an la nei ang a. Chelsea hi an chak anih chuan point 13-in hma an hruai fal anga, champion turin point thum bak an mamawh tawh lo ang.
An inhnehtawk a nih chuan Chelsea dinhmun a ṭha zawk dawn a, champion a puan ngam an ni bawk ang.