Hmahruaitu Khatla TBL an chak lo

Zirtawpni khan Hawla Indoor Stadium-ah Samsung 3:16 Plan Solution Mizoram Super League league stage match hnuhnung pahnih khelh a ni a, inkhel hmasa zawkah Zarkawt Serpents in final lut tawh Khatla TBL an barakhaih a, 70-69 in hnehna an chang. Zan inkhelah Chaltlang Ryders in 53-64 in Mission Veng Vikings an ngam lo a, MSL season hmasa berah match sawm khelin vawikhat bak an khingpuite an hneh thei lo.

Khatla TBL chelh dingtu Zarkawt

Mizoram Super League hmasa berah Khatla TBL an vawk lal len a, match kua an khelh tawhah hneh loh la tawng lo in an kaltluang. Hei mai hi a ni lo, match sarih an khelh meuh kha chuan final an lut tih a chiang tawh a, zirtawpni tlai thleng tih loh kha chuan anmahni khing zo an la tawng lo.

Mahse table mawngphah chung chiaha awm Zarkawt Serpents in Khatla TBL hi hneh thei an ni tih an tilang a, Zirtawpni tlai khan rinkai zawk TBL hi 70-69 in an hneh. Inkhel ṭan tirh aṭangin Zarkawt Serpents in TBL an ngam a, MSL-a an match hnuhnung berah chak loh an tum lo. An tum ang ngeiin Serpents an hlawhtling a, MSL-ah beisei angin che ṭha lo mah se chak result nen a hnu an khar thei hi an lawm ang. Serpents ho chakna hi anmahni ang tho a Zarkawt veng MSL club Zarkawt BCA tan chanchinṭha a ni thei. Zarkawt team chhe zawk nia ngaih in an hneh theih hi BCA in final-ah hneh loh an tum lo ang. An zuam sawt zawkin a rinawm. Chak kaltluan laia chak loh hi Khatla tan final-a an player te tihnual thei a ni bawk.

Khatla TBL tan H.Laldin­sanga a ṭangkai ngaiin a la ṭang­kai reng a, he inkhelah pawh hian points 20 lai rawn score in a nau te tan entawn tur a hnutchhiah.

Zarkawt Serpents tan Champhai tlangval Lalruat­tluanga'n a thiamna rawn pho chhuakin Serpents chak nan a thawhhlawk hle a, points 14 a team tan rawn score in rebounds pasarih a la thei a ni.

Chak hmel hmu thei lo Ryders

Season ṭan tira champion tum Chaltlang Ryders in MSL mawngphah luah chungin hnu an khar. Ryders hian match 10 inkhelhah vawikhat chiah an khingpuite an hneh thei a, an record hi a chhuanawm loh hle. MSL season hmasa bera an match hnuhnung berah pawh hian chak ngei tumin bei mah se points 21 score tu Lalmuanpuia Zote-i'n thlawptu a nei ṭha tawk lo a, an chak zo ta lo a ni. Vikings tan points 16 score tu Lalnunpuia'n a team tan a thawhhlawk hle bawk.