Wladimir Klitschko-a'n a title a humhim leh ta

Ukrainian boxer kum 39-a upa Wladimir Klitschko-a'n a la tar lo tih tilangin Inrinni khan Madison Square Garden, New York khawpuiah Bryant Jennings a hneh a, WBA, IBF, WBO leh IBO World Heavyweight title a kawl lai te a humhim a, vawi 18 chhung a zawna a title a humhimna a thleng ta.

Klitschko chuan 116-111, 116-11, 118-109-a a hneh tak Jennings chu fak chhunzawmin, "Jennings hian heavy­weight boxer tam tak a hneh thei ang tih ka chiang a, inhnek pui a hahthlawk hle a ni, " a ti. Jennings hian Klitschko a tum hma hian vawi 19 inhnekah a khingpuite a la hneh fai vek a ni.

Klitschko hian a kut che rang tak a chakpui a ni ber a, inkhel ṭan tir aṭangin American boxer Jenning hi a in veng tluanchhuak deuh thaw a ni.

Jennings a hneh zawh hnu hian Wladimir Klitschko chuan British Boxer Tyson Fury chu hnek a chak thu a sawi leh nghal a, "Tyson Fury nen hian Europe-ah kan inhnek ngei a ngai a ni," tiin a cho hle.

Vawi 67 inhneka vawi 64 a khingpuite hneh thei Wladimir Klitschko chuan, "Fury nen hian Germany-ah emaw Great Britain ram chhungah inhnek ngei ka duh a, kan inhnek theih dan tur buaipui a nga a ni," tiin kum 26-a upa Bristish Boxer chu cho hle.

Vawi 24 inhneka la chak fai vek Fury chuan Klitschko chona hi chhanglet nghalin , "Wladimir Klitschko hnek tur hian engtiklai pawh in ka inpeih reng a ni," a ti.