La Liga Barcelona-in an hma hruaina sawh nghet

Barcelona chuan La Liga a an hmahruaina an sawh nget zel a, Inrinni zan khan an khingpui Espanyol chu 2-0 a hnehin table-ah point nga in hma an hruai fal rih. Pathianni zana Real madrid leh Celta Vigo inkhel result a zirin Real leh Barce inthlauhna hi la danglam leh thei a ni.

Barca defender Jordi Alba leh Espanyol central defender Hector Moreno te chu hnawhchhuah an ni a, inkhel a tawp meuh chuan player 10 ve ve chauh an ni tawh a ni.

Inrinni kha kum 45 a upa Tito Vilanova thih champha vawikhatna a ni a, cancer vanga thi ta an manager hlui thih chamah Barca-in hnehna an chang. Barcelona hi inelna hrang hrangah a a zawnin match 13 chhung hnehloh an tawng tawh lo a ni.

Inkhel ṭan aṭanga minute 15 chhung chu Barcelona-in inkhel an thunun hneh hle a, ball 82% lai an chang. Espanyol-in anmahni khelmualah Barca inkhel an en a ni ber. Liverpool striker hlui Luis Suarez chuan a tauh goal nghal teuh hle a, mahse Kiko Casillas-a'n a lo dang thei hlauh.

Lionel Messi a hmuhnawm leh a, Neymar nen Espanyol tlarhnung an chhaih buai nghal hle. minute 10 na lekah Messi through ball ṭha tak mai chu Neymar an dawng fuhin a thun nghal teuh hle bawk. Espanyol an inveng seng lo, minute 17-ah Neymar chuan an goal hmahruai a khung ta nge nge.

Brazil captain Neymar hian Barca-in Champions League semifinal an thlen theih nan Nilaini a Paris St-Germain an khelh ṭumin goal hnih a thun hlim hlawl a ni.

Goal khungtu ni lo mah se Luis Suarez a ṭangkai chhun­zawm a, Messi nena an inkawp chuan Barca goal hnihna an sual chhuak zui. Minute 25-ah Messi chuan angle zim tak karah an goal hnihna rawn thunin inelna hrang hrangah Barca tan goal 401 a khung tling der tawh.

Champion sawi ala hun lo - Enrique

Barcelona manager Luis Enrique chuan, "Match nga khelh hmabak kan la nei a, point 15 hmuh theihna tur ala nih avangin tunah chuan champion sawi ala hun lo deuhin ka hria. Hei erawh kan hriat aṭha ang, champion nomawi hi kan kuta awm thei a ni a, kan thloh loh hram ka beisei," tiin a sawi.

Sawi chhunzawmin Enrique chuan, "Kan khelh hmabak zawng zawng hi a pawimawh em em vek tawh a, kan tan chuan 'final match' vek a ni tawh ang. Zaninah pawh khan inkhel bul kan ṭan kha kha kan vanneih pui a ni mai a, a hnulamah kha chuan a awlsam tawh hauh lo tih kan hre vek ang. Chuvangin tumah inthlahdah thei kan la awm lo," tiin a sawi.

Inkhel dangah pathumna din­hmun hauh tu Atletico Madrid chuan Antoine Griezmann goal hnih khung hmangin Elche chu 3-0 in an hneh. Tlak hlau Levante chu Getafe lakah 1-0 a chakin point thum hlu tak an hlawhchhuak bawk. David Moyes a naute Real Sociedad an chak zo lo a, an khingpui Villarreal nen goal awm loin an inhnehtawk.