Liverpool Champions League beiseina a chuai
Season hmasaah beisei phak baka Liverpool an chet ṭhat avangin Reds ho in tun season-ah champion an sawi ri a, season ṭan hnuah beisei an phak loh avangin Champions League an sawi ri ngam ṭawk a, Inrinn zanah khualmuala an hneh ngei tua ngaih West Brom chu goal inpe lo a an inhnehtawk pui avangin Champions League khelh an beiseina pawh thaibo sakin an awm mek.
Kum 1968 hnuah Liverpool in 0-0 a West Brom khelmual an ṭin san hmasak ber na inkhelah hian captain Steven Gerrard-a'n Liverpool tana a League match 500 na a khel tling chiah a, free kick aṭangin Reds captain hian a pet goal teuh hle nghe nghe. PFA Player of the year nominee zinga langphak Philippe Coutinho-a dan pangaiin a hmuhnawm leh hle a, West Brom tlarhnung chhaih buaitu ber a ni. Mario Balotelli kan hmu hlawl a, February hnua a start leh hmasak ber a ni bawk.
Liverpool in inkhel an thunun viau a, an ball chan zat pawh hi 74% zet a ni. West Brom goal-ah vawi 22 an pet a, mah se a pawimawh ber goal an khung theih tlat loh avangin draw result-ah an lungawi mai a ṭul ta a ni.
Saints leh Spurs an inhnehtawk
Southampton khelmual St. Mary's a inkhelah Saints in minute 29 na lekah Italian striker Graziano Pelle hmangin goal hmahruai an khung a, Erik Lamela chuan mikhual team Tottenham Hotspurs tan minute 43 na lekah a sut. Pelle bawkin minute 65 naah Saints hi hma rawn hruai pui mahse Tottenham in goal an phur rei duh lo a, minute 70 naah Nacer Chadli hmangin an sut leh a, 2-2 in an ṭin ta a ni.
Team pahnih hian season laihawl vel kha chuan Champions League khelh an sawi ri a, season chawhnu lama an result avangin tunah chuan Champions League a beiseiawm tawh lo hle.
Harh tharna chang Leicetser
Leicester City in khualmualah Burnley 1-0 in an hneh a, rei tak an lo awm tawhna bottom three aṭangin an talchhuak ta. Burnley in Matty Taylor-a penalty pet goal loh an ui hle ang.
Jamie Vardy chuan he inkhela goal awmchhun hi minute 60 naah khungin an inkhel hnuhnung vawi ngaa a goal thun vawi thumna a ni a, Leicester tan match li chhung a zawna an chakna a ni ta bawk.
Hull pawh an chak e
Champion inchuh leh Champions League khelh phak inchuh boruak a san zel laiin tlak hlau inkhel pawh season dang ang tho in a hmuhnawm thei hle.
Crystal Palace khelmual Selhurst Park-ah mikhual team Hull City an tlangngel zawk a, first half-ah goal lut lawk lo mahse second half-ah Hull tan Senegal striker Dame N'Doye a inlar a, kum 30-a upa striker hian minute 51 na leh 90 naah a team tan goal khungin 2-0 in Hull City hi hnehna a chanpui a ni.
Inkhelh hmabak match nga la awmah Hull in an khelmualah vawi li an khel dawn a, season thara Premier League an khelh leh khelh loh anmahni kutah a innghat thui hle. Relegation zone aṭanga an himna hi point khat chiah a ni.
Chak lo rei Newcastle
Newcastle United fan-te an team kaihhruai a nih danah an lungawi lo a, tunhnaiah nasa takin an club neitu Mike Ashley duhlohna an lan tir. Hetiang boruak tuam vel duhawm lo tak hnuaih Newcastle in chak hmel an hmu thei lo a, match sarih chhung a zawna an chaklohna ni turin an khelmualah mikhual team Swansea City chu 2-3 in an hneh lo. Kum 38 hnua Newcastle in an khelh chhiat ber ṭum an tawng mek.
Magpies tan Ayoze Perez leh rei tak inhliam vanga chawl tawh Siem de Jong te chuan goal khat khung mahse Welsh club Swansea City tan Nelson Oliveira, Gylfi Sigurdsson leh Jack Cork te'n goal an khung avangin 3-2 in Swansea chak zawkah an ṭang ta a ni.
Khel ṭha QPR chak zo lo
Loftus Road-a inkhelah mual neitu Queen Park Rangers an vanduai a, Charlie Austin chuan inkhel ṭan aṭanga minute 22 naah James Collins handball vanga penalty an hlawhchhuah chu goal-ah a chan tir thei lo. QPR hian Richard Dunne hmangin goal an khung leh a, referee thutlukna dik lo avangin hei pawh hi goal-ah pawm a ni lo.
Tla mai thei dinhmuna ding reng QPR hian inkhelh hmabak pali la awmah Liverpool leh Manchester City khelmual an la lenchilh leh dawn avangin Inrinni zana an result hi a la pawi thui thei.
Tlak hlauhawmah Sunderland
Inkhel ṭan aṭanga minute khat na lekah mikhual team Sunderland in Connor Wickham hmangin goal hmahruai khung mahse tunhnaia khel ṭha em em mai Scottish midfielder Charlie Adam-a'n minute 27 naah goal ṭha tak hmanga a chhanlet vangin 1-1 in an ṭin ta a ni.
Team Dinhmun
# Team Pld W D L GF GA GD Pts
1 Chelsea 32 23 7 2 65 26 39 76
2 Man City 34 20 7 7 70 36 34 67
3 Arsenal 32 20 6 6 63 32 31 66
4 Man Utd 33 19 8 6 59 31 28 65
5 Liverpool 33 17 7 9 47 36 11 58
6 Tottenham 34 17 7 10 55 49 6 58
7 Southampton 34 17 6 11 47 26 21 57
8 Swansea City 34 14 8 12 41 44 -3 50
9 Stoke City 34 13 8 13 39 42 -3 47
10 West Ham 34 11 11 12 42 42 0 44
11 Crystal Palace 34 11 9 14 42 47 -5 42
12 Everton 33 10 11 12 41 43 -2 41
13 West Brom 34 9 10 15 32 46 -14 37
14 Newcastle United 34 9 8 17 36 57 -21 35
15 Aston Villa 34 8 8 18 26 48 -22 32
16 Hull City 33 7 10 16 31 45 -14 31
17 Leicester City 33 8 7 18 35 51 -16 31
18 Sunderland 33 5 15 13 26 49 -23 30
19 QPR 34 7 6 21 38 59 -21 27
20 Burnley 34 5 11 18 26 52 -26 26