Hyderabad aiin Mumbai an lian zawk

Zirtawpni khan India Premier League-ah match hnih awmin inkhel hmasa zawkah Mumbai Indians in run 20 in Sunrisers Hyderabad an hneh a, zan inkhelah Chennai Super Kings in run 97 in Kings XI Punjab an hneh bawk.

Hyderabad ngam loh Malinga

Zirtawpni tlai khan Wankhede Stadium, Mumbai-ah Sri Lanka fast bowler Lasith Malinga-a'n a thiam thil a lan tir a, Mumbai Indians tan over li a vawmah run 23 chiah pe in wicket li lai a la thei.

Mumbai-in over 20-ah run 157 vawchhuakin mi pariat an hloh a, Ricky Ponting-a nau te zingah Lendl Simmons che ṭha berin West Indies batsman hian ball 42 a hmachhawnah run 51 a vawchhuak a, mualpho lo in batsman dang chet ṭhat loh zanah a team tan a thawhhlawk hle.

Batsman nei ṭha Hyderabad lamin an target hi an umpha mai dawn emaw tih hnuah Malinga a lo lang. Sri Lanka bowler hi Hyderabad batsman te'n an ngam loh avangin over 20-ah run 137 chiah vawchhuak theiin mi pariat an hloh a, run 20-a an tragte umpha lo in chak lo zawkah an ṭan a ngai ta a ni.

Punjab sawptu Chennai

MA Chidambaram Stadium, Chennai-a inkhelah mual neitu Chennai Super Kings in an mikhual lakah hawihawmna an lantir duh lo a, run 97 laiin Kings XI Punjab an hneh.

Chennai Super Kings tan Brendon McCullum-a'n a thiam thil a 'show' a, World Cup neih zawh taka che ṭha tak New Zealand batsman hian ball 44 a hmachhawnah run 66 a vawchhuakin dinhmun duhawm takah a team a hlangkai. Captain MS Dhoni chuan ball 27 a hmachhawnah run 41 vawchhuakin McCullum hi a thlawp ṭha hle. Chennai hian over 20-ah run 192 lai vawchhuakin mi pathum chiah an hloh a ni.

Punjab in theihtawp chhuahin an target um ve bawk mah se an batsman te'n Chennai bowler ho an ngam loh avangin an che hleithei lo a, over 20-ah run 95 chiah vawchhuakin mi pakua an hloh a ni. Punjab tana run siam hnem ber Murali Vijay chuan ball 32 a hmachhawnah run 34 a vawchhuak hram a ni.