I League Second Division PIFA Sports Vs Aizawl FC; Chanmari FC Vs Mohammedan SC

Vawiin chawhma dar 9:30-ah MPL3 champion Aizawl FC-in table mawngphaha awm PIFA Sports an hmachhawn dawn a, Mumbai club hi Chanmari FC point li hlohna an nih avangin zuam ngawt a thiang lo. Chanmari FC hmabak erawh a ko hle, palina Mohammedan SC nen lai dar 2:00-ah an inkhel dawn.

Aizawl FC hian point 22 hmu tawhin hmahruaitu an ni mek a, Lonestar Kashmir FC (19 Pts), Chanmari FC (18 Pts) leh Mohammedan Sporting Club (16 Pts) te'n an hlat lo hle. Match nga chiah khelh tur a awm tawh a, vawi 14 khelh zawha a sang berin season tharah I League an khel dawn.

Aizawl FC an inpeih

Aizawl FC leh PIFA inkhelh hmasak zawk ṭum khan MPL club hi 6-1 zetin an chak a, goal ruk hi player paruk Alfred Kemah Jaryan, Morgan Justice, Rohmingthanga, Thomas Lalengkima, H. Lalbiakthanga leh B. Zoramthara te'n a khung.

Aizawl FC coach K. Malsawmkima chuan, "Kan chak turah chuan ka ring ngawt a, ruah a sur erawh chuan a har khawp ang. Khua hi ṭha se duhthusam chu a ni a, chak tumin ruahmanna kan siam a, Pathian zarah kan chak theih ka ring," tiin point thum an hmuh theih a rinthu a sawi.

Aizawl FC player-te an dam kim a, coach-in duhthlan tur a nei. Chutichung chuan foreigner pathum zinga pakhat chiahin starting eleven a chan hmel. Mala chuan, "Emma hian beisei a pha lo a, MPL-a kan hmuh ṭhin ang kha a ni. Justice hi Mizo player-te aia a ṭhatna ka hmu lo. Hming nei ringawt an lut dawn lo a, chuvangin kan foreigner neih zingah Alfred chiahin starting eleven a chan ka ring," tiin an khelh dan tur a sawi a, match hnuhnung bera Hindustan lama goal hnih khungtu Michael Lalremaruata chu chance pek leh a tum thu a sawi.

Mipui chungah lawmthu sawiin Mala chuan, "Siliguri-ah Missionary te'n min ṭawiawm a, Golaghat lamah IR Batallion-a Mizo ṭhahnem takin min ṭawiawm thung. Min ṭantute'n thawm an nei ṭha a, inkhelh a nuam khawp mai. PIFA kan khelh hunah pawh hian min rawn ṭawiawm leh dawn a, an chungah kan lawm hle a ni," a ti.

Hmabak sawiin MPL3 champion coach chuan, "Game nga kan la nei a, theihtawp chhuahin kan la tichho zel ang. Kumin hi kan tan chuan hun ṭha a ni a, bawhpelh loh hram kan tum," tiin a sawi.

Chanmari an zam lo

Mohammedan SC hmachhawn tur Chanmari FC hi an chak lo a nih chuan I League sawi ngam a har tawh ang. MPL2 Champion hian inhliam vangin V. Lalṭanpuia leh Lalawmpuia te an hmang thei dawn lo a, Cameroon player Patrick Arol Enondji dinhmun a chiang a lo bawk.

Chanmari FC leh Kolkata club inkhelh hmasak zawk ṭum khan 1-1 in an inhnehtawk a, minute thumna lekah Lalbiakhlua'n khung mah se Mohammedan hian Oluwaunmi Somide Adelaja hmangin an sut.

Chanmari FC coach H. Vanlalthlanga chuan, "Golaghat Stadium kha khelh a har riau a, PIFA kan draw-na ground kha Aizawl FC leh United SC in draw-na tho kha a ni. Tun ṭumah erawh PTC Stadium Dergaon-ah kan khel dawn a, a ziaawm turah ka ngai," a ti.

Thlanga chuan sawi zelin, "Mizo player-te hi an ṭha tawh viau a, tawnhriat neih tlemna erawh a lang leh ṭhin. Ballboot hling sang kan player-te'n an kawl tel lo hi a pawi a, goal khung theihna tur chance an hlah phah ṭhin. Kolkata leh Mumbai club te hi chuan natural grass-ah an khel ngun a, an danglamna hi a lang leh ṭhin," tiin a sawi.