Dr TAo Football Mizoramin semifinal an thleng

Zirtawpni tlai khan Mizoram leh Manipur an inhnehtawk a, Dr TAo Football-a record nei ṭha pahnih hian Group 2 aṭangin semifinal an lut.

DSA Ground, Sil­char-a inkhelah Mizo­ramin R. Laldanmawia penalty hmangin minute 40-naah hma an hruai a, Manipur-in first half tawp hma hretin penalty aṭang thoin an sut. Second half-ah goal a lut lo a, 1-1 in inkhel a tawp.

Mizoram hian Mani­pur hmachhawn turin Tripura an hneh ṭuma hah­chawlh tir keeper Vanalhriata, defender Lalrinzuala leh midfielder Johny Lalfakzuala te an luh tir a; tlar hnungah Rinzuala chu dinglamah awmin TC Vanlalhruaia leh MS Dawngzela chu defence laiah an ding a, vei lamah Lallawmzuala a awm.

Midfield-ah Johny chuan tlar hnung puih hna a thawk a, Ramthar tlangval hmaah hian Ramhlun South duo Samuel Lalhruaitluanga leh Lalnunmawia te an awm. Ding lamah Danmawia a awm a, vei lamah Lalfakzuala awm bawk. Tlar hmaa mal tlat chu MPL2-a Chanmari FC champion puitu MS Dawngliana a ni.

MPL1 best player Danmawia'n goal khung theihna tur chance ṭha Fakzuala leh Dawngtea te siam sak chu a hlah ve ve mah se Fakzuala penalty hlawhchhuah erawh Sialhawk winger hian a khung chiang hle.

Mizoram goal chhuah hi Rinzuala ball clear-in a defender pui Hruaia kut a per avangin Manipur-in penalty aṭangin an khung a. Mizoram player pawimawh Mawitea leh Manipur player chu hnawh­chhuah an ni bawk.

Manipur hian point sarih hmuin Group 2 hmahruaitu an ni a, Mizoram hi point ruk hmuin pahnihna a ni. April 28, Thawhlehni khian Mizoramin Group 1 hmahruaitu Assam nen Guwahati-ah an inkhel ang a. Manipur hi Group 2 pahnihna Nagaland nen Silcharah an inhmachhawn thung ang.

Mizoram coach HC Zarzoliana chuan, "Player-te khelh danah chuan ka lungawi khawp mai. Amaherawhchu referee thutlukna hi chu hriatthiam harsa ka ti ṭhin. Mawitea khan a khawih let miah lo a, an pet lui a, an hnawhchhuak tel ve kha a mak khawp mai. Hetiang zel a nih chuan champion a harsa khawp ang," tiin referee match kaihhruai dana a lungawi loh thu a sawi.

Mizoram manager Lalṭanpuia Hnamte chuan "Kan thlen tirh aṭanga Silchar kan chhuahsan thlengin Mizoram House DRC-in min ṭawiawm ṭha a, a chungah kan lawm takzet. Tin, Silchar Mizo zirlaite, Mizo Welfare-te, Mission Compound-a Mizo awm­te'n theihtawpa min ṭawi­awmnaah kan lawm hle a ni," tiin a sawi.

Patea chuan sawi chhunzawmin, "Kolasib DFA hruaitu, Vairengte Zone hruaitute min rawn ṭawiawmnaah an chungah kan lawm hle. Silchar kan awm chhunga kawng engkima min buaipuitu PSO pahnih AwP-a leh Dika te chungah kan lawm bawk," a ti.