Police-in semifinal ticket an sual chhuak
Mizoram Police-in Ramhlun Athletic laka goal hniha an hnufual hnuah si phurh an sut zo a, MPL champion lai hian point khat hlu tak hlawh chhuakin semifinal an lut. Police hi match hnuhnung pathumah 2-0 in hnufual mah se an si phurh an sut leh vek a, an huaisen rah sengin champion nomawi humhim thei tur dinhmunah an ding.
Ramhlun erawh Police laka hnehna an chan theih loh avangin semifinal beiseina a tawp a, hnehna an chan loh chhanah referee an puh. Coach Danny Lalduhawma chuan, "A thutlukna hrim hrimah kan lawm lo. Referee zawng zawng kan sawisel lo a, mipa national referee kan neih chhun hi ham tlakah kan ngai lo. MPL Board-ah pawh hei hi kan thlen tawh a, amah bawkin kan match a kaihruai leh hi kan thinur hle," tiin Vanglaini a hrilh.
Goal hnih ve ve
Chak mamawh Ramhlun Athletic-in bul an ṭan ṭha a, minute lina lekah vei lam aṭanga left back James-a cross chu Police keeper R. Malsawmkima'n tiperin awlsam takin Richard Lalnunpuia'n a pet lut. Ramhlun an phur chhunzawm a, Richard-a ball pass ṭha chu Lalawmpuia Hnamte-in minute 14-naah a pet goal.
Coach Danny hote bul an ṭan ṭha a, semifinal khel turin an dinhmun a ṭha. Mahse, goal hnih chhuah hnuah Police an phur sawt. F. Lallawmkima'n penalty hlawh chhuakin H. Lalbiakthanga'n goal-ah a chantir thei lo a, goalkeeper C. Vanlalhriata'n a dang ṭha hle.
MPL10 best player BT-a'n a tihsual thup bo nan, minute 40-naah ṭha zetin a pet goal. Ramhlun an insiamrem mai lo a, minute khat hnuah hla tak aṭanga R. Malsawmkima freekick pet chu keeper Hriata'n chhut sualin goal-ah a lut. First half-ah 2-2 a ni a, Police dinhmun a ṭha leh ta zawk.
Boruak a ṭang
Ramhlunin semifinal lut turin chak an mamawh tih an hria a, second half-ah risk an lak avangin an goal bawh a na sawt. Police keeper Mana'n a hna a tlin a, Felix Lalruatsanga top scorer beiseina a tihtawp sak.
Chutihrualin Ramhlunin ṭum hnih penalty beiseina an nei a, box chhungah Police defender Lalrinchhana'n Felix Lalruatsanga titlu mah se penalty pek an ni lo. Chutihrualin Felix hi tlu lo pawh ni se dinglam aṭanga ball vawrh luh a su hman dawn lo.
Man of the match-a thlan Y. Longvah pawhin ṭha takin box chhungah a la lut a, Police defender FC Lalhmunmawia hmaah tlu mah se referee-in penalty pe loin yellow card a pe zawk. Referee thutluknaah Ramhlun an lawm lo a, inkhelh banah pawh an lungawi lohna an lantir a, inkhel result erawh a danglam phah tawh lo.