Spurs hneh lotu Man United mangang leh lungngaiin an kun

Manchester United tan khua a var thei lo. Pathianni zan khan Erik Ten Hag-a hote mualphona belhchhahin a awm a, an mual Old Trafford-ah Tottenham Hotspur lakah 3-0 in an tlawm. Spurs tan Brennan Johnson, Dejan Kulusevski leh Dominic Solanke ten goal khat ṭheuh an khung a, vanneih ṭum ni se goal tam zawk khung thei an ni.

Spurs hian point thum an hlawhchhuah vangin pariatnaah an invawrhchho a, Man United erawh 12-naah an tla. Mualneitu lamin goal khungtu an nei lo a, captain Bruno Fernandes a nih avangin khelmual chhungah hruaitu an nei lo. Tun season-a an chet dan vangin Man United ṭantute mangang leh lungngaiin an kun a, hrehawmin a bawm a, lawmna tur reng an hmu lo.

Van de Ven a bawn

Man United-in nung takin bul an ṭan a, mahse an fimkhur tawk lo. Marcus Rashford-a'n a ball khalh luh lai chu holam takin a hloh a, Spurs defender Micky van de Ven-a'n a chhuhsak.

Van de Ven hian pass chhuak nghal mai loin mual laiah a khalh phei a, a zawn pheia awm Fernades, Manuel Ugarte leh Noussair Mazraoui ten an um pha lo hle. Dutch defender hian halfway line thlen hma aṭanga box hma thleng a khalh hnuah, a aia chak lehzualin box chhungah a la lut thu a, a hnampui Matthijs de Ligt pawhin a tackle hman lo.

Spurs defender cross ṭha zet chu Brennan Johnson-a'n goal ruakah a khung a, mikhual team-in minute thumna lekah hma an hruai der. Nottingham Forest aṭanga Spurs zawmtu Johnson hian match li chhung, a zawn zatin a pet goal tawh.

Mahse, a siamtu Van de Ven hi fak a ṭul. Dutch defender hi Premier League-a tlan chak ber record kawltu a ni hrim hrim a, kumin January khan Brentford nen an inhmachhawn ṭumin 37.38 km/hr-a chakin a tlan a, Kyle Walker record (37.31 km/h) record a khum.

Khawvela tlan chak ber Usain Bolt-a'n kum 2009-a 100m-a world record a siam khan 37.58 km/h-in a tlan a, Van de Ven hian a hlat miah lo!

Bruno, i dawn tawi

Man United-in an hneh lo zawk a, Spurs-in inkhel an thunun zawk. Johson-a'n goal ban a pet per a, Cristian Romero bicyle kick pawh goal pawnah a chiah a kal.

United tan Alejandro Garnacho-a'n goal ban pet per bawk mah se Spurs an khel ṭha zawk a, mualneitu an insiamrem thei lo. Harsatna belhchhah turin captain Bruno Fernandes chuan Van de Ven-a khalh chhuak tur chu a tlawh thlu a, referee-in red card a phawrh nghal.

Portuguese midfielder hi a tawlh thluk avangin a vanduai a, mahse a ke lekchhuakin Van de Ven-a ke a tlawh miau si avangin VAR pawhin a chhan ta lo. Player 11 pawha an ngam loh lakah United-in player 10-in an khel a, mahni muala khel mah ni se, an hmabak a thim hle.

A goal belh

Ten Hag-a'n an khelh dan a siksawi a ṭul tih a hria a, Kobbie Mainoo aiah Mason Mount chu first half tawp dawnah a luhtir a, second half ṭantirhah Casemiro a luhtir leh bawk.

Mahse, first half ṭantirh ang thoin Spurs-in goal an khung hma. Counter attack-ah Spurs-in an vaw let a, goal hmahruai khungtu Johnson chu a siamtu niin minute 47-naah Dejan Kulusevski-a'n ṭha zetin a pet goal.

Spurs an phur zel a, an striker thar Solanke-a'n corner kick aṭanga a ball hmuh chu minute 77-naah a tlawh goal. London club hian goal dang khung belhna remchang pawh an ngah a, Timo Werner finishing a ṭha tawk lo a, United keeper Andre Onana a khel ṭha ve bawk.

An mualah Man United 3-0 in an tlawm a, match hnuhnung pathumah chak hmel an hmu lo. An result a ṭhat miau loh avangin season hnuhnung pahniha League Cup leh FA Cup champion puitu Ten Hag-a hmalam hun a chiang leh ta lo hle.