Chanmariin a tawp an khar ṭha

LZ Juice MPL11-ah Chanmari FC-in league round match hnuhnung berah FC Bethlehem 3-2 in an hneh a, kim lo chunga chaka a tawp an khar avangin semifinal atan inrintawkna an ngah sawt ang. Chanmari hian hnehna an chan avangin pakhatna dinhmun an luah a, nizan Aizawl FC leh Chawnpui FC inkhel result-in league winner tur a hril ang.

Chanmari tan Samuel H. Lalhlimpuia, Lalnunzira, Lalbiaknia Royte leh Laldinthara ten goal khat ṭheuh an khung a; Bethlehemin table mawngphah chhuahsan thei tawh lo mah se Rohlupuia leh Samuel Lawmsiamkima te hmangin goal an khung a, nuam sain Chanmari an chaktir lo.

Chanmariin MPL leh I League 3 an khelh kawp avangin Mizorama club football inelna sang berah an insawrbing thei lo. Heti chung hian Aizawl FC an chelh thei a, league round tawp ber thlengin league winner nih beiseina an nei. I League 3 final round khel tura an tlin hnuah Sihphir Venghlun lakah chesual mah se Lalsangzuala Hmar hoa player 20-in Kolkata an pan hnuah tlawm an nei miah lo.

Chanmari hian kim loin Chawnpui leh Mizoram Police an chelh a, match hnuhnung berah Bethlehem an hneh. Chanmarians hian Bethlehem hi hneh ngei an tum a, Kolkata aṭangin Lalruatsanga chu round 14 khel turin an hawtir a, I League 3 khel turin Kolkata a pan leh dawn.

Ruatsanga'n Chanmari tan ṭha takin a khel a, hnehna an channa kawngah pawh a pawimawh. Chutihrualin nimin inkhelah hian Bethlehem hian 2-1 in hma an hruai hman a, Chanmari tan Zirtea'n goal ṭha bik khungin inkhel kalhmang a tidanglam.

League winner nih beiseina la nei Chanmariin chak duhna thinlung an ngah zawk a, Ruatsanga ball petin Bethlehem defender Lalrochama kut perin penalty a hlawh chhuak. Biaknia'n penalty aṭangin hmahruaina goal a khung a, injury time-ah Laldinthara'n chak nemnghehna goal a khung leh bawk. Chanmari hi semifinal-ah an kim tawh dawn a, coach Lalsangzuala Hmar hoin an club history-a a vawi thum nan MPL nomawi chawi ngei an tum ang.