Ni thar a rawn inher chhuak dawn - Ten Hag

Manchester United ṭantuten Erik ten Hag ban hun an ngaichang a, BBC chief football writer Phil McNulty pawhin, "Ten Hag-a hun a tawp dawnin ka hria. Tun hnai mai a nih loh chuan, a hla tawh lo ang," tiin a ziak hial.

Mahse, Ten Hag erawh ban mai la tum lo a, an la ban mai dawn lo niin a sawi bawk. Dutch manager chuan, "Ban lampang ka ngaihtuah lo a, hetiang lam hi ka rilruah a la lang lo hrim hrim. Thutlukna kan siam ho a, thawh ho zel kan la duh.

"Club neitu, staff, player leh kei telin, kan ngaihdan kan sawi ho a, kan tumah kan chiang. Hun a duh dawn tih hre mah ila, kan duh dan a la inang tlang," tiin a sawi.

Manchester Unitd hian Ten Hag an lakluh hnuah result nei ṭha tawk lo mah se season hnih a enkawl tawhah nomawi a chawipui ve ve a, mahse an elpui club dangte hmasawn rualin hma an sawn ve lo tih erawh a lang thung.

Result chhe karah Ten Hag a la inringtawk, Man United boss chuan, "Kan tho chhuak leh dawn. Ni thar a rawn inher chhuak zel a, kan inzir belh zel. Ka player-te an huaisen a, kan inseamṭhat vat a ṭul a ni," tiin a sawi.

Man United thuneitute hian Ten Hag chungah rinna an nghat tak tak em tih hi ngaihtuah tham a tling. Season liam ta khan FA Cup an champion chungin contract an ziahpui lawk lo a, hun rei tak an ngaihtuah hnuah a chawlh hmanna hmunah an hrilh chauh.

Club thuneitute hian Ten Hag an nemngheh hma hian Thomas Tuchel pawh an dawr a, an duh ang manager an hmuh fuh loh vang chauhin Dutch manager hi an chhawr nawna ngaitu pawh an awm.

Old Trafford-a an mualpho zawhah Spurs ṭantute chuan, "Naktuk zingah an ban dawn che," tiin an au el a, mahse an la ban rih lo. Manchester United hian international break hmain khualmualah FC Porto an hmachhawn ang a, khualmualah tho Aston Villa an hmachhawn dawn.

Pep Guardiola leh Jurgen Klopp te hun titawp tura insawitu Ten Hag hi October international break hmain a hun a tawp thei a, chutihrualin thlakna tur ṭha an hmuh fuh loh chuan hun rei zawk a la cham thei a, insiamṭhatna hun ṭha a nei thei ang.