SYS FC naupanna a lang: A hunah Sihphir Venghlun an par

LZ Juice MPL11-ah Sihphir Venghlunin SYS FC 2-1 in an lehthal a, semifinal an lut. Hun pawimawhah kum naupang rual awm khawmna SYS an chesual a, Inter Village Football leh Futsal champion thei veng Sihphir Venghlun erawh hun pawimawhah an par chhuak thung.

Sihphir Venghlunin hnehna an chan avangin Chawnpui FC semifinal beiseina a tawp a; Aizawl FC, Chanmari FC, Mizoram Police FC leh Sihphir Venghlun FC ten knockout stage an lut. Semifinal khel tur chiang tawh mah se nizana AFC leh Chawnpui inkhel result kan hriat hman loh avangin inhmachhawn tur kan hre hman ta lo.

Nimin inkhelah hian SYS-in bul an ṭan ṭha a, Lalruatsanga'n minute 11-na lekah a penalty hlawhchhuah chu goal-ah a chantir a, draw pawha semifinal lut thei SYS dinhmun a ṭha. Mahse, Sihphir Venghlunin minute 10 pawh a ral hmain hma an hruai nghal.

Minute 14-naah centre back Malsawmtluanga Hrahsel ball vawrh luh chu Lalramluaha'n a tauh lut a, Mala vawrh luh bawk chu Lalthanpuia'n (Tepuia) a tauh lut leh bawk. Ball kangah SYS tlarhnung an talbuai a, minute li chhung leka goal hnih an chhuah avangin a sang pali aṭanga paihchhuahin an awm.

Lunglei club hian inkhel thunun hret mah se chance an insiam hlei thei lo a, Sihphir Venghlunin goal chance ṭha an ngah zawk. Second half-ah goal hmuh tur a awm tawh lo a, kum lama puitling zawk Sihphir Venghlunin 2-1 in hnehna an chang.