Buai kara Madrid derby-ah chak zawk awm lo

European football-a derby 'hot' ber pawl, Madrid derby chu Pathianni zan khan khelh a ni a, fans lam buaina siam vangin inkhel chawlh lailawk a ngai hial - boruak a 'hot' hle.

Mahse, boruak 'hot' ang huin inkhel erawhin beisei a phak lo - Real Madrid tana Éder Militão-a goal khung chu Angel Correa chuan hun pek belhah sutin, 1-1 in inkhel a tawp.

Atletico player Marcos Llorente chu hun pek belhah hnawhchhuah a ni bawk a, Real tan chhawrna hun a awm tawh lo. Chak zawk awm loin Madrid derby an ṭin a, Inrinni zana chak zo lo, hmahruaitu Barcelona tan result duhthusam a ni.

Derby chu

Atletico khelmualah team pahnihin goal khung an harsat a, first half-ah goal lut a awm lo. Minute 64-naah Real tan Militao chuan goal hmahruai a khung a, Atletico khelmual a reh duk.

Real-in goal an khung aṭanga rei lotêah mikhual goalkeeper Thibaut Courtois-a'n official hnenah fan-te chet dan a sawisel a, Atletico keeper hlui hian mualneitu fan-te chuan thil chi hrang hrang hmangin an vawm niin a sawi.

Referee-in club pahnih coach-te a biak rawn hnuah inkhel hi minute 20 bawr vel chawlh lailawk a ngai hial - Atletico boss Diego Simeone leh a player ṭhenkhat chuan an fan-te chu kal chilhin, nungchang mawi lantir turin an ngen hial.

A tawpah Atletico

Inkhel chhunzawm leh a nih hnuah Real hian 2-0 nih theihna remchang an nei zui a, mahse, Ballon d'Or dawng tur anga sawi Vinicius Jr 'shot' chu Jan Oblak-a'n keeper ṭha bik a ni tih pholan nan a lo hmang.

Atletico an awm mai mai bik lo - Samuel Lino chuan chance duhawm neiin, Courtois-a'n ṭha zetin a dansak. Mahse, Real an him reng bik lo. Hun pek belh minute linaah Correa chuan si phurh sutna goal a khung!

A la tawp lo cheu - Llorente chu Fran Garcia laka a chet dan avangin hnawhchhuah a ni. A tirah yellow card pek a ni zet a, mahse, video assistant referee rawn a nih hnuah red card pek a ni leh ta zawk.

Courtois thiam loh!

Madrid derby-a buaina chhuakah Simeone a lawm lo a, Atletico boss hian Real keeper Courtois a dem - Belgian keeper hian goal an khung khan a hnung lama Atletico fan-te lam hawi zawngin a lawm a, hei vang hian fans tam takin an vawm phah.

Simeone chuan, "Goal khungte chu kan lawm tur a ni a, mahse, fans lam hawi zawnga khatianga lawm kha chu a fuh tawk lo a ni. Fan-te hi anmahniin an thinrim ringawt lo a, chhaih an nih avangin an thinrim a ni," a ti.

Argentine coach chuan sawi zawmin, "Kan vaia kan thawh ho a ngai. Khelmuala thil vawmtute kha ka thiam hauh lo a, a chhaihtu pawh ka thiam chuang lo - an pahnihin hrem ve ve an ngai," a ti - Atletico chuan Police-te nena thawk hoin thil thlen dan an chhui mek thu an sawi.