Griezmann-a'n France a chawlhsan

France forward Antoine Griezmann chuan international football a chawlhsan thu a puang. Kum 33 mi Griezmann hian France tan match 137 khelin, goal 44 a khungsak a, assist vawi 38 a nei bawk.

Griezmann chuan, "Ka thinlunga kan sulhnu tam takte cham reng chungin international football chu ka thlah ta. Zinkawng hlimawm tak avang khan lawmthu ka sawi e," a ti - World Cup 2018 leh UEFA Nations League 2021-ah an ram tan champion nomawi a chawi.

Atletico Madrid forward hian World Cup 2018 final-a Croatia (4-2) an hneh ṭum khan penalty aṭangin a chhuih lut a, an ram captain Hugo Lloris a chawlh hnuah captain nih beisei mah se, Kylian Mbappe a tluk lo - Euro 2024 hma khan Griezmann chuan he thutlukna hi na a tih thu a lo sawi tawh.

Didier Deschamps hnuaia player pawimawh Griezmann chuan, "Kum 10 zet chona, hlawhtlinna leh theihnghilh theih loh tam tak hun kan tawng a, tunah chuan ṭhangtharte tan hmun ken a hun ve ta. France jersey ka ha thei hi ka chhuangin ka lawm hle a ni," a ti.

Euro 2016 final an luh ṭuma goal ruk khunga top scorer dinhmun luahtu Griezmann hi France boss Deschamps pawhin a thlah a, French manager chuan, "A chawlh hun tur hi rei tak kan sawi dun a, kum 10 liam taa ram tana a match hmasa ber a khelh aṭang khan kan inkar a ṭhain, inrintawkna nen tlang takin kan inkawm.

"Ka player duh ber angin tam tak chuan an sawi hial. Kan inkar boruak ṭha pawh kan chhawm nun zel ka beisei a, ka thinlung takin Grizou ka lawm e," a ti a, a player chu French football-a player ropui ber pawl a nih thu a sawi bawk.