Rodri tel loa insiamrem a ngai - Guardiola

Manchester City midfielder pawimawh Rodri chu hliam vangin tun season chhung a inkhel thei dawn tawh lo a, manager Pep Guardiola chuan an player ṭha chu ngai viau mah se a tel loa khelh dan an thiam a ngai tih a sawi.

Rodri hliam hnu an match hmasaah hliam vangin Kevin De Bruyne an la chhawr thei bawk si lo, midfield laiah Mateo Kovacic leh Rico Lewis te an awm a, an hna an tlin khawkhat viau - chutihrualin Newcastle United lakah an nghet tawk bik lo thung.

Guardiola chuan, "Rodri chungchang hi chu min la zawt reng dawn tih pawh ka hria, hei chu thil nih dan tur phung a ni. Theih ni se la chuan kan hnenah awm se tih hi kan duh dan a ni a, mahse tun season atan a theih loh.

"Thil theih loh vanga indawm kun mai tur erawh kan ni lo, kan player neihsa te hi an ṭha tawk a, anni ho hian theihtawp chhuahin season kan hmang mai tur a ni ang," tiin a sawi.

Premier League champion hian tunah chuan Champions League lam an ngaihtuah leh rih a ngai dawn. Zanin dar 12:30 hian Slovakian club Slovan Bratislava an lenchilh ang.