Villa chelhtu Ipswich Town

Premier League team hmuhnawm zinga mi Aston Villa chu kai thar Ipswich Town nen 1-1 in an inhnehtawk. Unai Emery naute hian Manchester City leh Arsenal lehpelh theihna remchang an neih chu an bawhpelh rih tihna a ni.

Pathianni zan Portman Road-a inkhelah, mualneitu Ipswich tan Liam Delap chuan goal hmahruai leh an si phurh sutna a khung, a goal khung inkar lakah hian Villa tan Morgan Rogers leh Ollie Watkins ten an khung ve thung.

Villa manager Unai Emery chuan, "Point hnih kan hloh avangin ka lawm lo, inkhel result erawh kan inhmeh viau thung - team pahnih khan point hmuh phu khawpin kan khel chhuak ve ve a ni.

"Goal thumna khung turin remchang kan insiam ṭhin a, mahse kan tihlawhtling thei ta si lo. Tun ṭum kan match aṭang hian Premier League awlsam lohzia a lang, kai thar team pawh an khawng thei takzet," a ti.

EPL match ruk aṭangin Villa hian point 13 an nei a, panganaah awmin an chunga awm Chelsea nen an point a inzat - hmahruaitu Liverpool an phak lohna pawh point hnih chauh a nih avangin season bul an ṭan fuh tih a chiang.