Semifinal-ah Alcaraz a lut

Aisa khawmualpuia inelna ngaihhlut pakhat China Open khelh laiah Carlos Alcaraz chuan semifinal a lut. Seeded pahnihna Alcaraz hian nimin tlai khan a khingpui Karen Khachanov chu straight set hmangin a hneh.

Diamond Court-a inkhelah Alcaraz-a'n bul a ṭan fuh pangngai a, a chesual duh meuh lo - seeded pasarihna ni phak Khachanov hi 7-5, 6-2 in a hneh a, champion turin match hnih dang chak a la hmabak a ni.

Kum 21 mi Alcaraz hian a match hmasa zawkah Tallon Griekspoor chu 6-1, 6-2 in a lo hneh tawh bawk a, hemi ṭum hian tennis a khelh hun chhunga vawi 200 a chak tlinna a lo tawng tawh bawk.

A kum naupang deuh mah se khelmual chhungah Alcaraz hi a puitling tawh a, inelna lian Grand Slam nomawi pawh pali ngawt a chawi tawh, tunlaia a rualpui zingah chuan major tournament ngam fal ber a ni chiang hle.

Spanish star Alcaraz chuan, "Match ka khelh zawng zawngah hian hnehna chan tumin ka bei ṭhin, ka tan chuan hetiang mellung phun hi thil hlu tak a ni," a ti. Match 200 a chak tawh lai hian, vawi 52 chu a chak lo zawkah a ṭang thung.