PSG kan hneh a pawimawh - Declan Rice

Arsenal midfielder Declan Rice chuan Champions League khelh dan phung thar chu a danglam hle tih a sawi a, an match hmasa zawkah Atalanta nen an inhnehtawk tawh avangin, tun ṭumah chuan an chak ngei a pawimawh hle tih a sawi.

Gunners hian zanin dar 12:30 hian Paris Saint Germain an lo mikhual dawn. Luis Enrique enkawl PSG hian goal khung nuam an ti ṭhin a, a venhim lam thiam North London club nen an inhmachhawn tur hi a hmuhnawm ang.

English midfielder Rice chuan, "Inkhel hautak tak mai a ni dawn tih chu a chiang reng mai a, eng anga hautak pawh ni se point thum kan hmuh a ngai dawn. Tuna kan team ang hian PSG hi kan la hmachhawn ngai lo, chuvangin mikhual thlen pawh kan nghakhlel hle.

"Ligue 1 lama an sulhnu kan hria, chu mai ni loin Champions League an khelh dan pawh kan hria, team ṭha berte zinga mi an ni. UCL-ah chuan team nem an awm thei lo, a ṭha zinga ṭha zual bik hmachhawn turin kan inbuatsaih," tiin a sawi.

Arsenal leh PSG danglam theihna tur hrang hrang an sawi a, chung zinga khawthlang chanchinbu lamin an sawi zui nasat ber nia lang chu 'Set Piece' a ni. Arsenal lamin an hman thiam laiin Paris club erawh an chetsual tamna a ni thung.

Mikel Arteta-a'n Manchester City aṭanga Arsenal a zawm khan set piece coach Nicolas Jover a hruai tel a, ani nen hian an thawk dun fuh hle. Jover kaihhruaina hnuaiah corner leh freekick an hmang thiam, kum 2021-a hna a thawh ṭan chinah goal 44 an khung phah tawh.

Premier League season hmasa khan Gunners hian set piece aṭangin goal 25 an khung, hetiang aṭanga khung tam ber an ni. Tun season kal laiah pawh thawnthu a danglam tam lo, an la hlauhawm reng - PSG erawh tun season chhunga an chetsual tamna a ni thung.

Paris Saint Germain hian Emirates Stadium aṭanga point hlawh chhuah an duh a nih chuan, a bik takin corner leh freekick-ah an inven uluk a ngai dawn hle tihna a ni.