Barcelona tan insiamrem hun a thleng

Hansi Flick-a hnuaia league match sarih zet a zawna an chak hnuah Barcelona an mualpho a, La Liga team vantlang Osasuna chu 4-2 ngawtin khualmualah an ngam lo - Catalan club tan result lawmawm lo a ni.

Zanin dar 12:30-ah Barcelona hian insiamremna hun an nei dawn a, Swiss club Young Boys chu Champions League match-ah an hmachhawn dawn. Mahni khelmuala inlan tur an nih avangin chak an beisei ang.

Thawhlehni zan Champions League inkhelah hian club lian inlan tur dang pawh an awm nual. Borussia Dortmund-in Scottish champion Celtic chu zan dar 12:30-ah vek an mikhual dawn a, German champion Bayer Leverkusen-in AC Milan an mikhual tur pawh en châkawm a ni.

Italian champion Inter Milan pawh zanin dar 12:30-ah vek an inlan dawn a, an mikhual tur hi Red Star Belgrade an nih avangin chak an inbeisei ang.

Hei le Barca

Barcelona-in La Liga-a tlawm an neih hma, an vung vanglai tak khan Champions League-ah AS Monaco an hmachhawn a, French club hi awlsam taka an hneh mai rin a nih laiin, khualmualah 2-1 in an mualpho.

European club football inelna sang bera an result hian Hansi Flick-a rilru a luah ngang a ni ang, zanina club lian pawh ni lo, Young Boys an hmachhawn tur ngaihtuah chungin league match hnuhnung berah player ṭha a hahdamtir a, a tisual chiang hle.

German coach hian inkhelh zawhah, "Kan chak loh vanga mawhphur tur an awm a nih chuan keimah ka ni," tiin a sawi a, a player thlak chu an tuar niah a ngai - zaninah an ṭhat dan berin Flick-a'n team a thawhchhuahpui ang.

Bayern Munich boss hlui chuan zanin an inkhel tur thlirlawkin, "A awlsam dawn lo - Young Boys hian team ṭha tak, rang taka khel ṭhin an nei a, chu chu kan rilrua kan vawn reng a ngai," a ti a, Swiss Super League club hi a en nau duh lo.

Leverkusen vs Milan

Season hmasaah Leverkusen-in tlawm nei loin Bundesliga nomawi an chawi a, player ṭha tam tak chhuak tura ngaih an nih laiin an chelh thei a, coach Xabi Alonso chuan club lian zawkte sawmna hnarin cham a thlang bawk.

Leverkusen hian season hmasa league lama an record chu an chhunzawm dawn lo chiang tawh a, match ngaah vawi thum chakin, vawi khat draw leh tlawm an nei - CL an match hmasa berah 4-0 in Feyenoord an sawp thung.

German club hi mahni muala inlan tur an nih avangin zaninah pawh chak an tum ang tih a chiang a, Liverpool, Inter Milan leh Atletico Madrid te an la hmachhawn dawn avangin zanina chak hi an tan a pawimawh bawk - mahse, Milan hmachhawn hi a awlsam dawn lo.

Italian club hian Serie A an match hmasa pathumah point hnih chiah hlawh chhuak mah se, match hnuhnung pathumah an chak vek a, he club hian Rafael Leão leh Christian Pulisic te an nei tih hriat tel a ṭha bawk - chutihrual chuan striker chhuanvawr Álvaro Morata chu he thu buatsaih a nih lai hian a dinhmun a chiang lo.

Inkhel dang

Serie A champion Inter Milan-in beisei angin season bul an ṭan lo. Milan derby-ah an hmelma kumhlun AC Milan chu 2-1 in an ngam lo a, match ruk an khelh tawhah vawi thum chiah an la chak - Champions League-ah zaninah an inlan dawn.

Simone Inzaghi naute hian CL-a an match hmasa berah team ṭha Manchester City chu 0-0 in an inhnehtawkpui a, City laka an khelh dan aṭanga teh tur a nih chuan Red Star hi chu harsa loa hneh tura ngaih an ni - Serbian club hian an match hmasa berah Benfica chu 2-1 in an ngam lo.

Dortmund khelmuala Celtic lenglut tur pawh hi en a châkawm viau. German club hian an CL match hmasa berah Club Brugge chu 3-0 in an sawp a, hetihlai hian league match thum leh German Cup-ah tlawm an la neih loh lai a ni. Mahse, Belgian club an sawp hnu lawkah barakhaihin an awm a, league lamah VfB Stuttgart chu 5-1 ngawtin an sawp.

Hemi hnuah hian insiamṭhain, VfL Bochum chu 4-2 in an hneh leh tawh - chutihrual chuan an hmachhawn tur Celtic hi tun season inelna hrang hranga la tlawm lo an ni a, CL-ah 5-1 ngawta Slovan Bratislava sawptu an nih avangin Dortmund lakah an indah nau bik lo ang.