Highlander an chelh

NorthEast United-in tun season ISL-a an match hmasa berah hnehna chang mah se, an match hnuhnung pahnihah chak an nei lo - Mohun Bagan lakah 3-2 a an tlawm hnuin, Pathianni zan khan Kerala Blasters nen 1-1 in an inhnehtawk leh ta.

Highlander hian Alaeddine Ajaraei hmangin goal hmahruai khung mah se, chak nan a tling tawk lo a, Noah Sadaoui chuan Blasters tan si phurh a sut - Sadaoui laka a foul hlauhawm tak avangin NorthEast United defender Asheer Akhtar chu hnawhchhuah a ni bawk a, mahse, Blasters hian a tam zawk nih an chhawr thei ta bik lo.

Indira Gandhi Athletic Stadium, Guwahati-a inkhelah hian Mizo player inlan an awm lo. Nizan ISL-ah inkhel awm loin chawlh a ni a, zanin dar 7:30 hian Hyderabad FC chuan Chennaiyin an mikhual ang - club pahnih hi Mizo tamna a ni.

Chennaiyin hian defender pahnih Laldinliana Renthlei leh PC Laldinpuia bakah midfielder Lalrinliana Hnamte an kawl a, match hnih an khelh tawhah player pathum an kawlte hian bul an la ṭan vek.

Hyderabad hian goalkeeper Lalbiakhlua Jongte, midfielder Ramhlunchhunga, Isaac Vanmalsawma Chhakchhuak & Lalchhanhima Sailo, forward Aron Vanlalrinchhana leh defender Laldanmawia te an kawl bawk.