Jorge Martin a tlan fal

MotoGP championship hmahruaitu Jorge Martin chuan Indonesian Grand Prix-ah hnehna a chang a, amah hnaihtu Francesco Bagnaia nena an inkar tizauin champion turin kawng dik a zawh.

Mandalika International Street Circuit-ah Pathianni chawhnu lam khan intlansiak neih niin, a tir aṭanga hmahruaitu Martin hian hnehna a chang. Inrinnia tlan Sprint Race-ah che fuh lo mah se, intlansiak takah erawh amah el phaktu an awm lo.

Spanish rider Martin hnungah hian a hnampui Pedro Acosta a thleng - Acosta hi championship lamah pangana a ni a, champion beiseina la nei mah se a tan kawng erawh zawh tur a thui a, beisei nei sang vak thei erawh a ni tawh lo thung.

Martin el phak bertu Francesco Bagnaia chu pathumnaah thlengin an inkar zau lutuk tur a la vawng him zel. Enea Bastianini leh Marc Marquez te erawh an chetsual avangin Indonesian MotoGP an tlan zawh meuh chuan an tan champion beiseina a zim ta hle bawk.

Khawvela bike intlansiakna sang ber hi Asia khawmualpuiah an tlan chhunzawm dawn. October 6, Pathianni hian Twin Ring Motegi-ah Japanese Moto Grand Prix an tlan leh dawn a ni.