A chung berah Conte enkawl Napoli

Antonio Conte awmna team hi chu a danglam leh tlat ṭhin - Napoli chuan Pathianni zan khan Monza 2-0 in an hneh. Conte naute hian tun season Serie A match ruk aṭanga point 13 hmuin table hmahruaitu an ni.

Stadio Diego Armando Maradona-a inkhelah Naples club tan hian Matteo Politano leh Khvicha Kvaratskhelia te chuan goal khat ve ve an khung a, mikhual Monza lamin a chhanletna tur an nei ve lo.

Italian manager Conte hian Napoli dinthar leh a tum a, a league match hmasa berah Hellas Verona chu 3-0 in an ngam lo, a hnuah erawh insiamṭhain tlawm an nei tawh lo - Juventus nen an inhnehtawk bak chu an chak vek.

Serie A hmahruaitu Napoli manager Conte chuan, "Europe-ah kan inlan loh avangin kar tluanin inbuatsaihna hun kan nei thei a, hei hi chanchin ṭha lai chu a ni. Chutihrualin, Europe khel phak lo chu hmasawn kan ngai hle tih a ni thung.

"Thla thum liam ta mai khan club President nen kan inbia a, tah chuan squad siamṭhat chungchang kan sawi dun. Nipui bazarah khan player 14 an chhuak a, min rawn zawm thar pasarih an awm thung, kan nihna anga khel tur chuan hun kan mamawh.

"Tunah hian Serie A hmahruaitu kan ni ngei mai, mahse a nihna takah chuan champion tura rinkai kan ni lem lo. Squad puitling leh hrim ṭha tak tak an awm a, chung mite el phak erawh kan tum ang," tiin a sawi.