I Day Football 2016 AIFF U19 hnehin Aizawl FC an tho

30th July, 2016

Aizawl FC-in Chanmari FC hneh loin I Day Football 2016-ah bul ṭan mah se nimin khan AIFF Under 19 chu 2-0 a hnehin team ṭha an nih zia an pholang.

Lammuala inkhel hmuh-nawm takah hian Aizawl FC tan Ghanaian striker Bright Mid-dleton Mends chuan a club thar tan goal a khung ta a, defender Ricky Lallawmawma'n tun season-a a match hmasa berah goal ropui a khung bawk.

AIFF U 19 an che rangin an hmuhnawm a, an ruh a la no deuh tih mai loh chu en tham an ni.

Goal mamawh

Aizawl FC coach K. Mal-sawmkima'n goal an mamawh tih hriain tlarhma lamah Ghanaian striker Mends leh rawlthar striker Lalremsanga-te thlawp turin B. Zoramthara a dah lut. Goal khung tura dah luh player pathum pui tur hian field sirah Brandon VL Remdika leh Albert Zohmingmawia te an awm bawk.

I Day Football champion tlarhnungah erawh Mizo player ṭha an awm khawm a, keeper-ah Lalawmpuia awmin defence-a ding chu Ricky Lallawmawma, Lalramchullova, Lalruatthara leh Lalrinzuala Khiangte te an ni a, player pali pui tur hian H. Lalbiakthanga a awm bawk.

Mizo pathum

AIFF Under 19-ah Mizo pa---sa-rih an awm a, player pa-thumin bul an ṭan. Midfielder Lal-engzama Vangchhia, forward Rohmingthanga leh right back Zonunmawia ten bul an ṭan a, B. Lalnuntluanga chu training-naah a malpui a tih nat avangin a tel lo.

Captain Edmund Lalrindika chu a la dam chian loh avangin bul a ṭan lo a, vice captain Abhi-sek Haldar chuan armband a hreng.

A hmuhnawm

AIFF Under 19-in an zir ang thlapin bul an ṭanah a ngaih theih a, Aizawl FC tlarhnung an ṭhiat mawi nghal hle.

Pogba hminglem an phuah Abishek a hmuhnawm a, in-khelh
ṭan tirha a ball fing tak chu Namgyal Bhutia-a'n um lutin goal thun thei dinhmunah ding mah se keeper AwP-a'n a dang ṭha hle. AIFF Under 19-in chance hlah an tuar a, minute 38-naah goal an chhuah.

Dinglam aṭanga Albert-a ball vawrh luh chu out tura ngaih a nih hnuah Brandon-a'n pet lut leh hramin Mends-a'n a tauh lut. AIFF U19 player-te'n sawisel mah se referee-in goal-ah a pawm tlang a, hei hi Aizawl FC chet ṭhat inṭanna a ni.

Aizawl FC tan injury time-ah BT-a'n box pawn aṭangin goal ban a pet per a, hemi hnu lawk hian yard 35 vela hla aṭangin Ricky-a'n a pet goal - ruahsur nâlah ball tlang chak avangin dan theih a ni lo. First half a tawp zui.

Chhum zing

Second half-ah chhum zing vangin inkhel tihtawp chhoh zeuh zeuh a ni a, ruah a sur reng bawk avangin AIFF U19-in ngai an awh leh tawh lo.

Aizawl FC-in goal chance
ṭha an ngah zawk a, Ruatthara'n goal ban a tauh per bakah Brandon leh Mends ten chance ṭha an hlah bawk.

Goal khung theihna chance
ṭha ber hlahtu erawh Chullova niin Aizawl FC defender hian minute 67-naah Albert-a penalty hlawhchhuah chu goal zawnah a pet lo.

AIFF U19-in si purh sut tumin Edmund Lalrindika an luhtir a, captain Edu hian a chance neih tauh lut lo mah se a thiamna erawh hmuh hmaih theih a ni lo.

Second half-ah goal a lut lo a, Aizawl FC 2-0 in an chak. Ti hian AFC-in Chanmari FC point hmuh zat point thum an hmu ta chiah a, group of death tia an sawi Group A a ngaihnawm chho zel dawn.

Eng nge an sawi?

Aizawl FC coach Mala chuan, "AIFF Un-der 19 chu ka beisei aiin an
ṭha a, chutihrualin ka naute pawh an khel ṭha viauin ka hria. Second half-a kan chance neih kha hlah lo ilang chuan goal li hial pawh kan khung thei ang," tiin an khelh dana lungawi thu Vanglaini palai a hrilh.

AIFF U19 coach Floyd Pinto chuan an goal chhuah hmasak chu, "Referee-in a ham miau loh chuan kan inring reng tur a ni a, inzirna tur kan neih belh a ni. Ka awmna aṭangin engmah ka hmu pha lo a, kan thiam loh a ni. Aizawl FC anga team ṭha lakah ṭha taka kan khelh theih avangin kan khelh danah chuan lawm lohna tur ka hre lo," tiin referee a sawisel duh lo.

Pinto chuan, "Goal hmaah kan hriam tawk lo a, tlarhma lamah kan insiamṭhat a ṭul. Inzir turin Mizoramah kan rawn zin a, kan duh ang tak kan hmu,"tiin I Day Football chu naupang tan inzirna ṭha a nih thu Vanglaini palai a hrilh.