Given-a'n Ireland a mangṭha

Republic of Ireland goalkeeper Shay Given chuan ram tana inkhelh a chawlhsan thu a puang. Kum 40-a upa keeper hian ram tan kum 20 a khelh chhungin match 134-a inlan hman a ni.

Stoke City keeper chuan, "Ram tana khel phak player tlemte zinga mi ka ni hi ka inchhuang a, mah se tunah erawh ka goal ven thuamte hlip a hun ve tawh a ni," tiin ram tana inkhel zel tur chuan a upat tawh thu a sawi.

Kum 1996-a ram tana a match hmasa ber Mick McCarthy hnuaia kheltu keeper chuan sawi chhunzawmin, "Tunah chuan club lamah ka insawrbing tawh dawn a, min ṭawiawm ṭhintu ka chhungkua leh fan-te hnenah lawmthu ka sawi a ni. In tel lo chuan vawiina ka thlen chin hi ka thleng lo ang," a ti.

Given hi kum 2002 World Cup leh 2012 European Cham-pionship-ah te first choice niin ram tan a inlan a, 2012-a ram tana inkhelh a chawlhsan hnuah lo kir lehin kumin Euro khelh zawh takah pawh khan Ireland squad-ah a la awm a ni.