A man phu tawka khelhchhuah tum Higuain

Napoli aṭanga pound maktaduai 75.3-a Juventus zawmtu striker Gonzalo Higuain chuan a man phu tawk ang ngeia khelhchhuah a tum thu a sawi. Kum 28-a upa Higuain hian Thawhlehni khan khawvela player manto pathumna ni turin Juventus hi season nga chhung atan a zawm a ni.

Argentina international chuan, "Tun-ah chuan Juventus-in min leina zat hi ka phu ngei a ni tih tihlan a hun ve ta. Juventus hi khawvel huapa club hriat hlawh an ni a, he hmunah hian hlawkna tam tak ka chhar ka beisei," a ti.

Higuain hian season hmasa khan Serie A-ah goal 36 khungin 1928-29 season-a Gino Rossetti-a record lo siam tawh Serie A season khata goal khung hnem ber record chu a nihrual a, inelna hrang hrangah goal 38 a khung.

Napoli neitu Aurelio De Laurentiis chuan an club chhuahsantu Higuain hi na taka sawiselin 'phatsantu' ah a puh. Mahse, Higuain chuan Laurentiis hi chhang nghalin, "De Laurentiis nen hian kan inmil ngai lo. Juventus hi ka thlang ngei a, min nawrtu erawh amah a ni. Mahse, Juventus ka zawm hi ka lawm takzet a, min nei tura an beihnaah lawmthu ka sawi a ni," tiin a hlim hle.