I League club Lajong nge nge

Shillong Lajong-in I Day Football 2011 an champion hnua a vawi khat nan Lammualah competitive match an khel a, Bethlehem Vengthlang 2-1 in an hneh.

I League club Lajong hi chak mah se nimin inkhelah hian an chungnung lo a, an keeper Phurba Tempa Lachenpa-a'n red card a hmuh bawk avangin point thum an hmu hi an vanneih vangah a ngaih theih.

Shillong club tan Bipin Singh leh Milan Basumatary ten goal an khung a, BVT tan hun tawp hnaihah Lalrinsanga'n goal khat a khung ve bawk.

Player 10-a hun rei tak khel chungin mikhual Lajong-in point thum an hmu - I League club nge nge.

BVT an chesual

MPL club Bethlehem Vengthlang leh I League club Shillong Lajong an inkhing tawk a, goal chance ṭha hmuh tur a awm lawk lo.

Minute 24-naah lu hmanga back pass chu BVT keeper Lalmuansanga tan man mai theih ni mah se a awmna hriat chian tawk loh vangin a lu hmanga a tauh sual bakah Bipin Singh-a'n a tihbuai vangin a ke hmangin a tisual nawn leh a, Lajong winger Bipin hian awlsam takin goal ruakah a khung.

Chetsual vawi khatna hi vawi hnih­nain a chhunzawm a, Muan­sang­a'n man rei vangin freekick a chawi a. Lajong midfielder Jacob Lalrawngbawla'n freekick hi petin goal sirah chiah a kal a, BVT an him hram.

Captain Dingngheta hoin BVT an harh thar a, ding lam aṭanga BVT skipper cross chu Zosangkima'n a tauh na tawk lo. Coach Lalbiaksanga Colney-in game thlak tumin Royal Wahingdoh midfielder hlui Sangkima aiah Lalmawizuala (Astea) a luhtir a, an nawr na sawt bawk.

BVT forward Lalrammuanpuia (Apuia) ball vawrh ṭha tak chu Dingngheta'n pressure a pek ṭhat bawk avangin Lajong keeper Phurba-a'n box pawnah a kutin a beng a, hnawhchhuah a ni. Second keeper Meithouilie Chalieu luh theih nan winger Radeem Tlang chu minute 41-naah lakchhuah a ni a, BVT defender Lalhlima'n an freekick hmuh a hmang ṭangkai thei lo.

Player 10-a khel Lajong an tal­buai a, Lalrinsanga'n Lajong substitute keeper vawi hnih a fiah a, Chalieu hian fiahna a paltlang ve ve. First half tawp hma chiaha Dingngheta shot-cross erawh keeper chetṭhat vang ni loin changtu nei lo PC Zosanga finishing ṭhat tawk loh vangin a goal lo.

BVT an vanduai zel

Player 10-a khel Lajong-in Samuel Lalmuanpuia leh Bipin-a hmangin chance an nei nghal a, goal hlauawm tak tih tur erawh a ni lo. BVT lamin goal chance an nei zui a, goal khung theihna tur vawi thum an hlah.

A hmasa berah Dingngheta cross chu Apuia'n goal zawnah a tauh lo a, hemi hnu hian Astea killer pass chu Rinsanga tan duhthusam ni mah se goal ban bak a pet per thei lo.

Captain Dingngheta chu ball ṭha petuah a ṭang zel a, through ball fing tak chu Astea'n a dan fuh tawk loh vangin engmah loah a chhuak.

Minute 59-naah Lajong game plan hlawhtlinna a takin a lang a, counter attack hmangin goal an khung. Assam striker Milan-a'n a tlan chakna hmangin hmun thawl a insiam a, ball a thiam vanga Lalhlima a bum hnuah chiang takin a pet goal. Lajong-in player 10-in khel mah se 2-0 a hma an hruai tak avangin BVT tan thawh lehna kawng a inhawng tlem hle.

Minute 74 a nih chuan BVT an insiamṭha leh tawh a, vei lam aṭanga Rinsanga cross ṭha zet chu substitute Lalramliana'n a tauh hman lo.

Minute 86-naah BVT an vannei ve ta nge nge, Lajong rawlthar keeper Chalieu-a ball petchhuahin Rinsanga hnung a per hnuin a goal.

Goal dang khung belh leh turin hun tlem la nei mah se an hmanhmawh luatah Lajong tlarhnung tan buaina lian tham an siam lo. Shillong club erawhin Milan-a hmangin goal khung belh theihna tur an nei nawn a, keeper Muansanga'n inrintawkna a neih let tawh avangin BVT-in goal an chhuah tawh lo.

Khel ṭha

Bethlehem Vengthlangin inkhel an thunun zawk a, goal hmaah an hriam tawk loh avangin a chak lo zawkah an ṭang. BVT coach Lalbiaksanga Colney chuan, "Goal 10 hial pawh khung thei kan ni a, mah se kan vanduai ṭum a ni miau si. Kan player-te khelh danah pawh ka lungawi a, an theihna zawng zawnga an khelh avangin sawisel tur ka nei lo," tiin vanduai vanga chak loa a inngaih thu Vanglaini palai a hrilh.

Lajong nge nge

An match hmasa berah an khelṭha tawk lo chungin point thum an hlawh chhuak a, player 10-a khel chungin goal dang an khung belh leh bawk.

Shillong Lajong coach Thangboi Singto chuan, "Practice match pawh nei loin inelna kan hmachhawn nghal a, player fitness la ṭhat tawk loh avangin khelh a harsa a ni. Chutihrualin kan khelh danah hnualna tur a awm lo a, kim lo chunga point thum kan hlawh theihna chhan hi player-te thawhrim vang a ni," tiin Vanglaini palai a hrilh.