Russian badminton player-te Olympic-ah inlan dawn
Damdawi hman phal loh hmanga puh an nih avanga Russian infiammite an mualpho hnuah Badminton World Fede-ration (BFW) chuan Rus-sian badminton player-te chu Rio Olympic-a an inlan an phalsak thu an puang.
International Olympic Commit-tee chuan Russian in-fiammiten Rio Olympic an hmachhawn theih dawn leh dawn loh chu infiamna tina an pawl thutluknaah a innghah thu a lo sawi tawh a, he thutlukna avang hian World Anti-Doping Agency (WADA) chuan an lungawi loh thu an lo sawi tawh nghe nghe.
Russia hian Rio Olympic inelna hmachhawn tura in-fiammi a neih 387 zinga 108 chu Rio pan thei lo hian hrem-na hnuaiah an la awm mek a, August 5-a ṭan tur inel-naah hian boxing, cycling, golf, gymnastics, handball, taekwondo, weightlifting leh wrestling pawl hruaitute chuan an pawl hnuaia Russian infiammite inelna inlan an phalsak leh sak loh chungchang an la puang lo thung.
Badminton World Fede-ration (BFW) hotupa Thomas Lund chuan, "Rio 2016 Olympic ngaihtuah ran chungin kan hnuaia infiammiten damdawi hman phal loh an hman leh hman loh chungchangah test programme kan lo nei tawh a, Russia aiawh tur badminton player pali pawh hi kan enfiahna hnuaia Russia pawn lama kan lo endik tawhte an ni," tiin an test programme an rintawk vanga Russia badminton player-te chu Rio-a kal phal an nih thu a sawi.
Nilaini khan Russian presi-dent Vladimir Putin-a hona hnuaiah Olympic-a tel tur Rus-sian infiammite thlahna hun hman a ni a, infiammi 70 zet chu Rio pan tur hian vailiam an ni.
Russian handball player Polina Kuznetsova chuan, "Min hal ral tumin an bei a, mah se chu chuan chakna min pe zawk si a ni. Russia hi tihkehsawm mai mai theih kan nih lohzia kan pholang dawn a, Rio-a kal ve thei lote tan kan bei dawn a ni, " tiin a sawi a, mipui pungkhawm thawm a ring hle.
International sports federation ten Russia infiammite laka thutlukna an siam dan chu a hnuaia mi ang hi a ni.
Aquatics
Tel tur : 67 Tel thei lo : 7
International Swimming Federation (FINA) chuan an pawl hnuaia Russia infiammi 67 chuan fiahna an paltlangah an ngai a, infiammi dang pasarih erawh damdawi hman phal loh an hmang ngeiah a ngai.
Archery
Tel tur : 3 Tel thei lo : 0
World Archery chuan uluk taka enchhinna an neih avangin Russian thal kah thiam pathum chu an kal a phal sak.
Athletics
Tel tur : 1 Tel thei lo : 67
International Association of Athletics Federations (IAAF) chuan Russian athletics zinga Rio tel thei tura tling zinga 67 chu an tel rem a tih sak lo a, long jumper Darya Klishina erawh Florida-a training neiin Russia pawn lamah test a neih avangin a tel phal sak a ni.
Badminton
Tel tur : 4 Tel thei lo : 0
World Badminton Federation (WBF) chuan Russian badminton player pali chu Olympic-a tel tlakah a ngaih vek avangin tel a phalsak.
Boxing
International Boxing Association (AIBA) chuan Russian boxer 11 chu uluk taka a enfiah mek thu sawiin thutlukna erawh a la siam lo.
Canoeing
Tel tur : 11 Tel thei lo : 5
International Canoe Federation chuan lawng kar lam inel mi Russian player panga chu Rio-ah an kal ve a phal lo.
Cycling
Union Cycliste Internationale president Brian Cookson chuan, "An vaia hrem vek chu thil theih loh tluk a ni," tiin a sawi a, Russian cyclist 11 tan beiseina a siam.
Equestrian
Tel tur : 5 Tel thei lo : 0
International Equestrian Federation chuan Russian player panga chu inlan thei turin phalna a pe.
Fencing
International Fencing Federation chuan an hnuaia Olympic khel tura tling Russian infiammi 16 an ennawn mek thu an sawi a, thutlukna an la puang thei lo.
Golf
Russia aiawha golf khel tura tling awmchhun world no 338 Maria Verchenova chungchang thuah International Golf Federation-in an thutlukna an la puang zar lo.
Gymnastics
International Gymnastics Federation chuan an hnuaia Russia infiammi 20 chungchang thuah thutlukna an siam thuai tur thu an sawi.
Handball
International Handball Federation chuan an hnuaia Russian infiammi 14 chu a rang thei ang bera test neih ṭhat an tum thu an puang.
Judo
Tel tur : 11 Tel thei lo : 0
International Judo Federation president Marius Vizer chuan an hnuaia Russian player 11 chu tumah an hrem loh tur thu a sawi.
Modern Pentathlon
Tel tur : 3 Tel thei lo : 1
Union International de Pentathlon Moderne (UIPM) chuan Maksim Kustov leh reserve Ilia Frolov te chu a hrem.
Rowing
Tel tur : 6 Tel thei lo : 22
World Rowing Federation (FISA) chuan uluk taka zirchianna a neih hnuah infiammi 22 chu Rio an pan ve a remti lo.
Sailing
Tel tur : 6 Tel thei lo : 1
World Sailing Board chuan Russian sailing team aṭangin paruk tel a phal sak a, an zinga pakhat Pavel Sozykin erawh hremna kaltlangpui a ni.
Shooting
Tel tur : 18 Tel thei lo : 0
International Shooting Sport Federation's executive committee chuan infiammi 18 chu Rio-ah an tel a phalsak.
Table Tennis
Tel tur : 3 Tel thei lo : 0
International Table Tennis Federation (ITTF) chuan an hnuaia Russian infiammite an chhui mek thu an sawi.
Taekwondo
World Taekwondo Federation (WTF) chuan thutlukna an la siam thei lo
Tennis
Tel tur : 8 Tel thei lo : 0
International Tennis Federation (ITF) chuan an pawl hnuaia Russian tennis player pariat chu vawi 205 aia tam test nei tawh an nih avangin Olympic-a an tel theih lohna chhan tur a awm loh thu an sawi.
Triathlon
Tel tur : 6 Tel thei lo : 0
International Triathlon Union chuan an hnuaia Russian infiammi hmeichhe pathum leh mipa pathum chu Rio pan tura an zalen thu a sawi.
Volleyball
Tel tur : 30 Tel thei lo : 0
Fédération Internationale de Volleyball (FIVB) chuan an infiammite chu an hnuaia test nei fo an nih avangin Olympic kal tura an thianghlim tawk thu an sawi.
Weighlifting
Tel tur : 8 Tel thei lo : 2
International Weightlifting Federation chuan Russian weightlifter pahnih chu vawi hnih lai test neih an paltlang loh avangin an hrem tawh a, a dang pariat chu enfiah mek an ni.
Wrestling
United World Wrestling chuan wrestler-te enfiah an nihna chu an pawm loh thu an sawi a, an hnuaia Russian wrestler-ten damdawi an hman ngei leh ngei loh finfiahna an phut mek.