Hammers season ṭan dan a duhawm lo

Season hman zawh taka Premier League team hmuhnawm West Ham-in tun season-a an match hmasa berah beisei an phak lo - Ningani zan khan Europa League qualifier-ah NK Domzale chu 2-1 in an hneh zo lo.

Hammers hian Olympic Sta-dium-a an match hmasa ber ni turin Slovenian club hi second leg-ah an hmachhawn ve leh dawn a, away goal an neih avangin Europa League play-off khel turin second leg-ah 1-0 a chak an tan a tawk ang.

NK Domzale khelmuala in-khelah hian mualneitu lamin inkhel ṭan aṭanga minute 11-na lekah Matic Crnic penalty hmangin goal hmahruai an khung a, Hammers-in minute riat liam hnuah penalty aṭang vekin Mark Noble hmangin an si phurh an sut.

Inkhel tawpa chungnung zawk erawh mualneitu team an ni a, minute 49-naah Slovenian winger Crnic chuan goal khat dang a khung leh avangin si khat phur chungin West Ham an haw.

West Ham-in goal thum an chhuah lohna turin goalkeeper Adrian-a'n Amedej Vetrih pet
ṭha zetin a dang a, London club an vannei. Hammers tan inkhel
ṭantir lamah player thar Sofiane Feghouli che ṭha viau mah se Euro khelh chauh vanga chawl mek Dimitri Payet tel lo West Ham-in an tuar tih a lang.