Bengaluru-a hlawhtlin tum Roca

I League champion Bengaluru FC coach thar Albert Roca chuan assistant manger tura Carles Cuadrat puan chhuah a nih ṭumin Bangalore club chu hlawhtlinna chanpui tura pan a nih thu a sawi.

FC Barcelona, Galatasaray leh Saudi Arabia-a coach ropui Frank Rijkaard assistant lo ni tawh manager chuan, "Bengaluru FC ka zawm theih avangin ka lawm a, champion team ka zawm avangin beiseina pawh a sang dawn tih ka hria. Mahse, theihtawp chhuaha hlawhtling turin he hmun hi ka lo pan a ni," a ti.

Kum 53-a upa coach chuan sawi chhunzawmin, "Bengaluru hmun leh hma te hi a ṭha em em a, he hmunah hian sawisel tura lokal ka ni lo. Tupawhin min puih huamin an inhawng a, he hmunah hian chhungkua anga bul kan ṭan avangin a nuam em em a ni," tiin a club thar chu nuam a ti nghal hle.

El Salvador coach pawh lo ni tawh chuan, "Barcelona mai ni lo, hmun hrang hranga ka tawnhriat te khan India ram rawn kal tur hian min pui nasa em em a, tihdan hrang leh kalphung hrang hrang ka lo tawnhriat tawh avangin buaina ka nei lo ang," tiin India ramah buai a inring lo.