I Day Football 2016 Inrinni tlaiah Lammualah veng lian pahnih inkhel Chanmari Vs Chhinga Veng
Aizawla veng hlun leh veng lian pahnih, Chanmari Veng leh Chhinga Veng-in vawiin tlaiah Lammualah football thiam zawk nih an inchuh dawn.
Tualchhung football a ṭhan chak avangin khelmual pawna inbeihna a lian tulh tulh a, Chhinga Veng FC hi MPL kai thar chauh an ni chungin MPL leh I Day Football-a champion tawh Chanmari FC chu player lei hun laiin an chhaih buai pha. Vawiin tlai dar 2:45 hian khelmual pawna inbeihna chu Lammualah seng luh a ni dawn a, hun tawp hamrik a rik hunah zawk tak nui ang maw?
Chanmari FC-in coach Lal-sang-zuala Hmar an lakluh hnua an match hmasa berah I Day Football champion lai Aizawl FC an hneh nghal a, goal nawr a nat tawk loh avangin a la lungawi lo cheu. Chhinga Veng FC hi an sawi vul chuk ang chu la ni pha lo mah se khin tham an ni tih lantirin Chanmari West FC lakah point an hmu thei tlat.
Chhinga Veng ṭantu 'Chhing-cows' nge tam ṭantu nei chhe ngai lo Chanmari FC ṭantu 'Chanmarians' tih vawiin tlai hian Lammualah a chiang dawn.
En bik tlak Msa
Kumin May thla tawp khan Federation Cup final-ah Aizawl FC leh Mohun Bagan te an inkhel a, midfielder R. Malsawmtluanga'n Guwahati a pan ve loh chhan chu chiang taka sawi chhuah a ni lo. Tualchhung football ngaihvente chuan season tawp ruala contract tawp tur MS-a hian AFC hi a chhuahsan an ring vek a, ta chhuak ta nge nge.
MSL2 best player MS-a hian Chanmari FC chu a zawm ta ngei a, amaherawhchu a club hlui a zawm dan kawng a khirh hle. Chhinga Veng FC-in an chuhpui a, MPL club thar hian an chang hman ṭep a, a tawpah Chanmari an ding chang.
CFC hi player inchuhnaah hawi sang thei an ni bik lo. Chhinga Veng hian an player duhlai Joseph Lalnunpuia chu chhuhsakin vice captain-ah an ruat zui a, Bawngkawn tlangval Lalrozama Fanai pawhin Chhingcows jersey a ha ta bawk.
Ṭha ber nih tum ve ve tan inkawm dial dial a theih lo a, khelmual pawnah Chanmari FC leh Chhinga Veng te an innawr tawh - vawiin hi inbeihna tak tak tur chu a ni.
Attacking football
Player-ten hma an sawn rualin coach-te pawhin hma an sawn ve zel tih lantirtu chu Chanmari FC coach hi a ni a, AFC B Licence nei coach Sanga enkawl team hi khelmualah an danglam - mipui tana lawmawm lai chu an hmuhnawm tel bawk.
Chanmari FC-in AFC an hneh ṭum khan goal hnih an khung a, winger tlan chak Lalmuanzoa'n a khelh phak lohna club tlarhnung a sut hawn fo bakah Lalruatfela leh Malsawmfela te chu buaina tham an tling.
Season liam taa BVT captain Lalrammawia lah dinglamah an khingpuite tan a hnawksak a, midfield laiah hming langsar MS-a ai mahin Lalrinchhana chu a chet ran avangin a langsar.
Champion lai lama goal hnih khunga hnehna chan chu result duhawm ni mah se coach Sanga chuan, "Kan attack na tawk lo. Kha aia na khan kan nawr tur a ni a, goal hnih kan khung tawh avanga inthlahdah an awm kha ka lawm lo hle a ni. Chhinga Veng kan tum hunah chuan a thlen nawn tawh loh ka beisei," tiin goal nawr zel a tum thu Vanglaini palai a hrilh.
Aizawl FC an hmachhawn ṭum ang bawkin defender pahnih MS Dawngzela (Notea) leh Ramfangzaua te an chhawr thei dawn lo a, left back Zautea a awm si loh chuan ke dinglama pet Thomas Lalengkima chu vei lamah an chhawr leh hmel.
Player ṭha pahnih awm lo mah se defence laiah Lalrin-chhana leh Lalmuanawma te an inkawptir thei a, ding lamah Lalrosanga an nei bawk, an khelh dan ni loin a player ang zawng chuan ṭha tak an ni.
Chanmari FC boss Sanga chuan, "Kan goal chhuah kha dan theih a ni. Chullova khan a pet ṭha a, a vengtu Rammawia khan pressure ṭha takin pe mah se a pawimawh hun takah a maimitchhing. A men tlat loh chuan mitdel ang mai a ni a, goal a venhim theih loh - kan ni tawh lo ang," tiin insiamṭhatna tur zinga point khat a tarlang.
Chhinga Vengin an match hmasa berah goal thum an khung a, Chanmari FC coach Sanga chuan, "Chhinga Veng hian inhawng taka an khelh avangin hriatthiam an har hle. Khuai ang deuh hi an ni a, a huhoin an nawr huk avangin chetsual theih a ni. Chutihrualin hmun khata player an tam chuan ruak a awm tawh tihna a ni a, hmun awl hmuh fuh chu kan tum tur a ni," tiin an ruahmanna ṭhenkhat a sawi.
Chhinga Veng lam
Chhinga Veng winger ṭha H. Lalmuankima chu Chanmari West an hma-chhawn ṭumin a dam ṭhat loh avangin inkhel bul a ṭan lo. MK-a a dam tawh avangin Joseph, Rozama leh MS Dawngliana te ho nen an club hlui Chanmari FC hmachhawn an châk tawh khawp ang.
Chutihrualin kai thar Chhinga Veng lam hian inhliam an la kawl nual a, hei vang hian first division an champion ṭuma player-ten mawhphurna tam tak an chelh ve a ngai dawn a ni.
Tawnhriat nei tawh Dawngtea leh Khawpuimawia-te goal bawh a na dawn a, MK-a a awm tawh dawn avangin Chhinga Veng attack hi an hlauhawm khawp ang - midfield hi pan deuh angin lang mah se, rawlthar balkl thiam harh ṭha tak tak an ni hlawm.
Chhinga Veng coach Lalremtluanga chuan, "Player inhliam la nei mah ila, a dam chhunte kan ring tawk. Chanmari FC hneh tumin game plan kan nei a, amaherawhchu kan khingpui tur hi an ṭhat miau avangin point khatah pawh kan lungawi ang. Mihring aṭanga ruahmanna chu kan zo tawh a, Pathian rinchhanna nasa zawk nen kal tawp hi kan tihtur chu a ni," a ti.
Chanmari fak zuiin Remtluanga chuan, "MPL club pariat zingah chuan Chanmari FC hi tun dinhmuna team ṭha berah ka ngai. An ṭha ka tih avang hian ka zam tihna erawh a ni lo a, hetianga team ṭha hmachhawn hi kan team tan fiahna ṭha takah ka ngai zawk," tiin a sawi.
Results & Fixtures
Shillong Lajong FC 2 - 1 Bethlehem VT FC
SLFC : Bipin Singh 24'; Milan Basumatary 59'
BVT : Lalrinsanga 86'
AIFF Under 19 0 - 2 Aizawl FC
AFC : Bright Middleton Mends 38'; Ricky Lallawmawma 45+1'
Vawiin Inkhel Tur
12:00 PM Dinthar FC Vs Zo United FC
2:45 PM Chanmari FC Vs Chhinga Veng FC
August 2, Thawhlehni
12:00 PM Chanmari West FC Vs AIFF Under 19
2:45 PM Ramhlun North FC Vs Shillong Lajong FC
August 4, Ningani
12:00 PM Aizawl FC FC Vs Chhinga Veng FC
2:45 PM Bethlehem VT Vs Zo United FC
Team Dinhmun
Group A
# Tean Pld W D L GF GA GD Pts
1 Chanmari FC 1 1 0 0 2 1 1 3
2 Aizawl FC 2 1 0 1 3 2 1 3
3 Chanmari West FC 1 0 1 0 3 3 0 1
4 Chhinga Veng FC 1 0 1 0 3 3 0 1
5 AIFF Under 19 1 0 0 1 0 2 -2 0
Group B
# Tean Pld W D L GF GA GD Pts
1 Dinthar FC 1 1 0 0 1 0 1 3
2 Shillong Lajong 1 1 0 0 2 1 1 3
3 Ramhlun North FC 1 0 1 0 0 0 0 1
4 Zo United FC 1 0 1 0 0 0 0 1
5 Bethlehem VT FC 2 0 0 2 1 3 -2 0