Ram tan Schweini Kan hmu tawh dawn lo

Germany captain Bastian Schweinsteiger chuan nimin khan ram tan inkhelh a chawlhsan thu a puang. Kum 31-a upa midfielder chuan, "Hrilhfiah zawh rual loha hun hlimawm leh hlawhtlinna ka lo chang tawh a ni," tiin ram tana a hnathawh chu chhuang takin a mangṭha.

Manchester United chhuahsan tur anga an sawi midfielder hian kum 2004 khan Germany tan a match hmasa ber a khel a, ram tan vawi 120 inlana goal 20 khungin Germany tana inlan tam lamah Lothar Matthaus (150), Miroslav Klose (137) leh Lukas Podolski (129) te chu a tluk loh awmchhun an ni.

Germany-in 2014 World Cup nomawi an chawina kawnga pla-yer pawimawh zinga mi Schweini chuan, "Eng-tikahmah ka tawn leh ngai tawh loh tur chu World Cup 2014-ah tawngin no-mawi kan chawi a, ka hriat-reng tawh tur leh thinlung luah reng tawh tur a ni. Tunah erawh ka chawlh a lo hun ve ta a, World Cup 2018 atana duh--sakna hlan hi ka tih theih awmchhun a ni ta," a ti.

Euro-a Germany tan inlan hnem ber ni tura match 18 khel thei Schweini chuan Euro 2016-ah a beisei ang thil a thlen loh thu sawiin, "Kum 1996 hnua kan chawi leh loh nomawi kha chawi ka duh em em a, mah se kan kum a ni lo tih hi ka pawm mai a ngai ta a ni," tiin Euro nomawi a chawi lo chu pawi a ti hle.