Dinthar nge lian Zo United?

Dinthar FC-in an match hma-sa berah Bethlehem Veng-thlang FC an hneh nghal a, I Day Foot-ball Group B aṭanga semi-final lut turin an dinhmun a
ṭha hle. Amaherawhchu nimin lama inkhelah Shillong Lajong-in BVT an hneh ve tho avangin 2014 I Day Football champion Dinthar tan semifinal kawng zawh zel turin Zo United hi an hneh a ṭul dawn a ni.

Vawiin chhun dar 12:00 hian Dinthar FC leh Zo United te Lam-mualah an inkhel dawn a, an club intawn tawhna aṭanga chhutin Dinthar an chungnung bik lo.

Zo United an lian zawk?

Mizoram chhungah I League te an han khel chho a, football ngainatu nia inchhal tan pawh MPL4 season tawp tama thil thleng kha theihnghilh theih a ni. Amaherawhchu Dinthar ṭantu dik tak 'Maimawms' tan erawh ngaihtuah let ringawt pawh a nat veng vengna tham a ni. November 28, Inrinni zanah Zo United-in MPL4 semifinal lut turin Dinthar FC chu 5-1 in an sawp.

Dinthar FC hi MPL1 cham-pion an ni a, MPL2-ah pathumna niin MPL3-ah pangana an ni. Season liam ta khan Dinthar FC hi semifinal lut tur zinga rinkai ni phak lo mah se match khat chiah khelh tur a la awm thlengin palinaah an awm. MPL1 champion hnuaiah hian Zo United an awm a, an inthlauhna chu point thum a ni.

Dinthar FC tan semifinal lut turin draw tawk mah se thilmak a thleng a, Zo United-in goal nga khungin semifinal an luh bakah an khingpui chu mualpho takin an hnutchhiah. MPL4 kha Dinthar FC chunga Zo United awm vawi khatna chauh ni mah se a hnuhnung ber a ni miau si. Thil awm dan hi Mizoram club hlun ber zinga mi Dinthar FC hian an pawm ngam a ṭul a, vawiin hi thlak danglam hun chu a ni.

Goal a pawimawh

Dinthar FC-in BVT laka point thum hmuh nan R. Lalnunmawia goal khat a tawk a, Zo United lamin Ramhlun North lama goal an khung miau loh avangin point khat chauh an la hmu thung.

Dinthar coach Lalchhuan-awma (Lcha) chuan, "Kan khelh dan hi ka ringtawk a, Zo United khelh dan lam ka ngaihtuah lo. Ka player-te an ṭhat theih dan bera khelhtir hi ka tum a ni," tiin a sawi.

Goal khung turin Lcha hian Michael Lalremruata, Samuel Laltlangthanga leh Lalruatpuia te a kawl nachungin hming langsar lo ber R-a chu score sheet a lang hmasa ber a ni daih a, heta ṭang hian an team balance ṭhat zia a lang. Dinthar boss hian tlarhnung lam siksawi a tum thu Vanglaini palai a hrilh a, wing back lamah rawlthar beiseiawm an inlan dawn niin a lang.

Zo United coach Vanlalrova chuan, "Goal khung kan mamawh a, chumi tur chuan practice-naah pawh kan thawkrim lehzual a ni. Ka hmuh dan chuan Dinthar ai hian player kan nei ṭha zawka, kan chak pawh ka ring," tiin Vanglaini palai a hrilh.

Zo United tan chak turin goal a ngai a, vawiina BVT an hma-chhawn ṭuma bench aṭanga lut Lal-biakkima'n bul a ṭan dawn. Thing-dawl tlangval hi mamawh chhanna a ni ang em tih chu hunin a hril ang.