Bundesliga champion Bayern Munich

28th April, 2015

Inrinni zan khan Bayern Munich-in Bastian Schweinsteiger goal hmangin Hertha Berlin an hneh a, Bundesliga-ah an la champion lo. Pathianni zanah pahnihna VfL Wolfsburg-in an khingpui Borussia Monchengladbach an hneh lo a, Bayern an champion.

Borussia Park-ah Gladbach-in inkhel an thunun a, goal erawh a lut tlai hle. Patrick Herrmann leh Fabian Johnson te'n chance ṭha an hlah hnuah minute 90-naah Max Kruse-a'n minute 90-naah a volley lut a, Wolfsburg an chak lo.

Wolfsburg hian point 61 an hmu a, match li khelh tur la awm mah se point 76 hmu tawh Bayern Munich an umpha thei tawh lo.

Bayern hian German football an thunun a, Pep Guardiola hnuaia ṭum hnih an champion hma hian Jupp Heynckes kaihruaina hnuaiah nomawi lian pathum (Champions League, Bundesliga leh DFB Pokal) an chawi a, tun season-ah pawh hian treble champion thei dinhmunah an ding. Kumin hi a zawna vawi thum an champion-na chiah a ni.

Inrinni zana Hertha Berlin an hneh khan goal an chhuah lo a, tun season-a match 21 chhung goal an chhuah lohna chiah niin 2012/13 season-a an record siam an tluk pha chiah a, record thar siam turin match li an la nei bawk.

2014 World Cup-a Golden Glove dawngtu Manuel Neuer-a'n clean sheet vawi 19 a nei tawh a, season khata goal chhuah lo tam lamah 201/02 season-a Oliver Kahn-a record a tluk pha chiah.

Bayern boss Pep Guardiola hian manager hna kum ruk a thawh chhungin league title panga a la a, Bayern ṭum hnih a champion pui hma hian La Liga-ah ṭum thum zet Barcelona a champion pui tawh.

Club chairman Karl-Heinz Rummenigge chuan, "Champion nomawi chawi nawn hi hlawhtlinna ropui tak a ni a, coach-te leh team-te thawhrah a ni. Ramin World Cup nomawi a chawi zawh season-ah ṭha takin kan khel a, a hun takah a lawmna pui takin a kan siam ang," tiin a sawi.

Bayern hian zanin dar 12:00 hian DFB Pokal semifinal-ah Borussia Dortmund an hmachhawn dawn avangin champion lawmna hun remchang an la nei lo.

Bayern tan German title ṭum 25 na chiah a ni a, kum 1963-a Bundesliga ṭan a nih hnuah vawi 24 an champion-na a ni bawk.