Professional Footballers Association Award sem a ni

Pathianni khan England rama football hmanga eizawng intelkhawm Professional Footballers Association Award sem a ni a, award sem langsar zual chu Player of the Year leh Young Palyer of the Year niin team of the year thlanchhuah a ni bawk.

PFA Premier League team of the year-ah Chelsea in player an thawhhnem ber a, palyer paruk lai an thawh.

Chelsea players lang te hi defender Branislav Ivanovic, John Terry, Gary Cahill, Nemanja Matic, Eden Hazard leh Diego Costa te an ni.

Premier League team lian zingah Manchester City player hmuh tur an awm lo a, Southampton-in Chelsea aṭanga an lei left-back Ryan Bertrand an rawn thawh nawlh bawk. Tottenham Hotspurs-in Young Player of the Year lawmmawn dawngtu Harry Kane an thawh a, Manchester United vawitam tak chhanhimtu goalkeeper David De Gea chu United player zinga lang awmchhun a ni. Arsenal-in season ṭan dawna Barcelona aṭanga an lakluh Alexis Sanchez-a'n Arsenal ai rawn awhin Liverpool tan an rawlthar duhawm Philippe Coutinho a lang bawk.

PFA Premier League team of the year

(formation: 4-1-3-2)

Goalkeeper:

David De Gea,

Manchester United

Kum 24-a upa Red Devils keeper hian tun season Premier League-ah vawi tam tak a team chhanhimin match 34 a khel a, vawi 86 save neiin match 10 chhung chu goal a chhuah miah lo bawk.

Defender:

Branislav Ivanovic (RB), Chelsea

Serbian defender hi Chelsea tlarhnung tan ban rinawm a ni a, a defending ṭhat bakah goal pawimawh thun a hrat na hi a larpui hle. Tun season Premier League-ah Chelsea tan match 33 khelin goal li a khung a, a ṭhiante thun tur vawi li a siamsak bawk. PFA team of the year-ah hian 2009-10 season khan a lo lang tawh bawk.

Gary Cahill (CB),

Chelsea

England international hian tun season Premier League-ah Chelsea tan match 29 a khel a, Premier League striker tam tak tibeidawngtu a ni. Season hmasa PFA team of the year-ah khan a lo lang tawh bawk.

John Terry (CB),

Chelsea

Kum 34-a upa Blues tana ban rinawm hian chuai lam a pan hleithei lo. PFA team of the year-ah 2003–04, 2004–05, 2005–06 te khan a lo lang tawh a, a tan thil thar a ni lo. Kum 2004-05 khan PFA Player of the Year-ah thlan a lo ni tawh nghe nghe a, Chelsea tlarhnunga Gary Cahill nen an inkawp hian Premier league striker te a ti hawihai ṭhin viau.

Ryan Bertrand (CB),

Southampton

Chelsea defender pathum zinga defender dang rawn lang ve hlawl Bertrand pawh hi Chelsea defender hlui tho a ni. Tun season-a Chelsea aṭanga Saints pantu hi beisei phak baka Southampton chet ṭhat chhan player langsar ber zinga mi a ni.

A defending ṭhat mai bakah tlar hma a puih thiamna hi a larpui hle. Saints tan tun season Premier League-ah match 30 khelin goal hnih a khung mai bakah a ṭhiante thun tur vawi hnih a siamsak bawk.

Midfielder:

Nemanja Matic (CDM),

Chelsea

Tun season Premier League-a Chelsea chet ṭhat chhan ber chu Serbian midfielder Nemanja Matic hi a ni. Kum 26-a upa Benfica aṭanga Chelsea pantu hian tun season Premier League-ah Chelsea tan match 31 a khel tawh a, tlarhnung puitu atan a ṭangkai ṭhin hle.

Alexis Sanchez (RW),

Arsenal

Kum 26-a upa Chilean Winger hian season ṭan dawn khan Barcelona aṭangin Chelsea a pan a, a tisual lo. Tun season Premier League-ah Arsenal player pawimawh ber pawl niin match 30 a khelhah goal 14 a khung a, a ṭhiante khung tur vawi riat a siamsak bawk.

Philippe Coutinho (CAM),

Liverpool

Kum 22 leka upa nichungin Brazilian midfielder hi Liverpool player pawimawh ber zinga mi a ni der tawh. Tun season-ah Liverpool tan match 30 khelin goal li a khung tawh a, ṭhiante thun tur vawi li a siamsak bawk.

Eden Hazard (LW),

Chelsea

Belgian winger hian tun season-ah Chelsea tan Premier League match vawi 33 khelin goal 13 a khung a, a ṭhiante thun tur vawi riat a siamsak bawk.

Striker:

Diego Costa, Chelsea

La Liga champion team Atletico Madrid aṭanga Chelsea pantu hian a tisual lo. Tun season-ah Chelsea tan Premier League match 23 a khel tawh a, goal 19 khungin ṭhiante thun tur vawi thum a siam sak bawk.

Harry Kane,

Tottenham Hotspurs

Kum 21 leka upa Spurs striker hian Tottenham tan tun season Premier League-ah match 30 a khel a, goal 20 khungin a ṭhiante thun tur vawi li a siamsak bawk.

*RB/LB - right back, left back. CB - centre back. CDM - central defensive midfielder, CAM - central attacking midfielder. RW/LW - right wing, left wing.

PFA Premier League Team of the Year thlan a nih rual hian PFA Championship Team of the Year pawh thlan a ni a, an thlan chhuahte chu;

Kieren Westwood (Sheffield Wednesday); Simon Francis (Bournemouth), Richard Keogh (Derby County), Russell Martin (Norwich City), George Friend (Middlesbrough); Grant Leadbitter (Middlesbrough); Matt Ritchie (Bournemouth), Bakary Sako (Wolves), Alex Pritchard (Brentford - on loan from Tottenham); Troy Deeney (Watford), Daryl Murphy (Ipswich Town).