PFA Player of the Year Eden Hazard
Kum 24 leka upa a ni a, Premier League-ah player langsar ber pawl a ni der tawh. Chelsea winger Eden Hazard chuan kum 2014-15 season-ah a football player pui te thiam tih a hlawh ber a, Professional Footballers' Association Player of the Year award lawmman a dawng.
PFA Player of the Year dawng thei tur hian Chelsea striker Diego Costa, Liverpool midfielder Phillipe Coutinho, Manchester United keeper David De Gea, Tottenham Hotspurs striker Harry Kane, Arsenal winger Alexis Sanchez leh Chelsea winger he lawmman dawngtu Eden Hazard te hming chhawpchhuah a ni.
Belgian winger Hazard chuan lawmman ropui tak a dawn vanga a lawm zia sawiin, "Ka hlim takzet a ni. Engtikniah emaw chuan player ṭha ber nih ka duh. Tun season-ah ka khel ṭha in Chelsea pawn kan khel ṭha takzet a ni," tiin amah mai bakah a team-in an khelh ṭhat thu a sawi.
Nikuma PFA Young Player of the Year lawmman dawngtu chuan, "He lawmman dawn hi ka phu leh phu loh ka hre lo a, mahse ka dawn avang erawh chuan ka lawm hle. Football chungchanga engkim hretu ka player pui te thlanchhuah ka nih avangin ka lawm hle a ni," a ti.
Young Player of the Year - Harry Kane
Nikum November aṭanga Spurs regular player ni ṭan ve chauh, kum 21-a upa English striker Harry Kane chu Young Player of the Year-ah thlan a ni. Kane hian Tottenham tan tun season in elna hrang hrangah match 47 khelin goal 30 zet a khung tawh a, a ṭhiante thun tur vawi nga a siamsak bawk a ni.
PFA Merit award - Steven Gerrard & Frank Lampard
English football a hming dai tawh ngai lo tur player ropui pahnih Steven Gerrard leh Frank Lampard te chu PFA Merit award hmanga chawimawi an ni.
Kum 34-a upa Liverpool captain Gerrard chuan, "Naupang rethei tak, vawiina ka dinhmun luah pha tura thawkrim em em ṭhin ka ni. Ka vannei a, career duhawm tak hmangin Liverpool leh England tana khelh ka lo ngaihtuah ṭhin chu ka ti hlawhtling a ni," a ti.
Captain Fantastic chuan, "Frank hi awihawm lo khawpa player ṭha, world-class player a ni. A ni lo hi he lawmman dawn pui tura duhthlan tur ka hre chuang lo," tiin season thara MSL a panpui tur Lampard chu a fak.
Chelsea player hlui Frank Lampard chuan, "Premier League-a hun rei tak chhung Stevie nen kan inkhel dun thei hi ka lawm takzet a ni. Football tana a theihna zawng zawng hlantu nena chawimawina kan dawng rual ringawt pawh hi ka tan chuan chawimawina ropui tak a ni. Kan pahnih tan inthlahna duhawm tak a ni a, ka tan chuan hei hi tawpna duhawm tak a ni," a ti.
PFA Award dawngtute:
Player of the Year - Eden Hazard, Chelsea
Young Player of the Year - Harry Kane, Tottenham Hotspurs
Women's Player of the Year - Ji So-yun, Chelsea
Women's Young Player of the Year - Leah Williamson, Arsenal