Gaal-a hoin Everton goal khung an thlir

Manchester United-in Chelsea an hneh loh hnu lawkah Pathianni zan khan Everton lakah goal thum an chhuah a, goal an khung ve lo. Goodision Park-ah United a zawna match thum chhung an chak lohna chiah a ni.

Premier League-ah Louis van Gaal-a team-te'n point 65 hmuin palinaah an awm a, pangana Liverpool aiin point sarih chiahin an sang tawh. Brendan Rodgers-a team-te hian zanin hian Hull City an hmachhawn dawn a, United nen an inkar tih zimna hun ṭha an nei ang.

Goodison Park-a in­khelah United-in mikhual team tlarhnung tibuai pha si loin ball an inpe kual a, ball possession 65% zet nei chungin a khat mawi tawkin Everton tih goal lai an thlir.

Minute ngana lekah counter attack aṭangin Everton-in goal an khung a, James McCarthy finishing ṭhat piah lamah United tlar hnung pan zia a lang chiang hle. Minute 35-naah Antonio Valencia venna aṭanga tal put John Stones-a'n ṭha zetin a tauh lut a, goal line-a ding Ashley Young-a'n a tih tur a ti tawk lo.

Minute 74-naah subsititute Kevin Mirallas-a'n cool zetin a khung a, goal luhna kawngah offside position-a ding Romelu Lukaku a inrawlh avangin referee thutlukna hi sawi zui theih tak a ni.

Goal khung beiseia second half ṭan tirha lut Radamel Falcao-a'n goal zawnah a tauh a, keeper tan a harsa lo. Colombian forward hian Premier League inkhel minute 363 hnuah goal zawnah a kal tir ve thei hram a, a hnu lama a goal khung erawh referee-in thutlukna dik siamin offside vangin a pawm sak lo.

Everton nen an inkhelh hmasak zawk ṭuma chakna goal khungtu Falcao hian United kawr a hak zui zel a rinawm ta lo. United goal hmaah an hlauawm lo a, keeper David de Gea chet ṭhat zarah goal thum bak an chhuah lo.

Everton manager Roberto Martinez chuan, "Inkhel kan thunun a, harsatna nei loin kan tih tur kha kan ti thei a ni. 3-0 a chak kha kan phu reng a ni. Tun season chhungin thil tam tak kan zir a, puitlinna kawng kan zawh. Player-te khelh dan thlirin kan dinhmun hi tun aia sang tur a ni," tiin a sawi.

Everton hi point 44 hmuin table-ah 10-naah an inhlangkai chiah a, kum 2015-ah an khelmualah chak loh an la tawng lo bawk.

Manchester United manager Louis van Gaal chuan, "Warm up kan neih khan fuh lo a awm a, ka ngaih a ṭha lo. Hun tawp lamah khan siam ṭhat kan tum a, a tlai hret tawh a ni. A vawi khat nan kan khingpuite'n keini aiin chak duhna an ngah zawk a ni. First goal kha thlir ula, goal luh hma khan ball inchuh pathum a awm a, a chak lo zawkah kan ṭang vek. A thlen tawh loh ka duh a, mah se chu chu duhthusam chauh a ni," tiin a sawi.

Everton player hlui Wayne Rooney leh Marouane Fellaini te an khel ṭha tawk lo a, chutihrualin Fellaini chhuah hnuah United game a la tla hniam lehzual.

United hian Premier League tawp hmain West Brom, Crystal Palace, Arsenal leh Hull City te an la hmachhawn ang.