Serie A-ah Juventus an chak lo
Kum 20 chunga a vawikhat nan Turin-ah Torino-in Juventus an hneh a, Juve champion tur an chelh khawtlai rih.
Andrea Prilo free-kick pet luh hmangin Juve-in hma an hruai a, a zawna a vawili nan Serie A champion nomawi an hnaih tawh hlein a lang hman. Mahse he goal khat hi Matteo Darmian leh Fabio Quagliarella goal khat ve ve thun hmangin Torini-in an chang let. Juve in second half-ah striker Carlos Tevez luh tir hnuhnawh mah se goal dang an khung thei tawh lo a, 2-1 in an chak lo zawkah an ṭang.
Derby a nih tawh hi chuan a boruak a sang ṭhin a, pathianni zan a Turin derby-ah pawh hian fans zingah buaina a chuak. Torino fans awm khawmnaah 'Paper bomb' vawm puah a ni a, he thil thleng vang hian Torino fans pakua in hliam an tuar a, an zinga pahnih chu an na hle nghe nghe a ni.
He thil duhawm lo thleng avang hian Juventus fans pahnih leh Torino fan pakhat chu man nghal an ni. Inkhelh ṭan hma a Juve Bus tlan lai chu Torino fan-te'nan lo tibuai tawh bawk a, Bus tukverh darthlalang pakhat chu an lo vawm keh tawh bawk a ni.