Liverpool-in Bologna an mikhual dawn

Premier League hmahruaitu Liverpool chu zanin dar 12:30 hian Champions League match khel turin an inlan dawn a, Italian club vantlang Bologna chu Anfield-ah an mikhual ang.

Reds hi an Champions League match hmasa bera 3-1 a AC Milan sawptu an ni a, San Siro-a inkhel an nih bawk avangin an result hi 'duhthusam' tia sawi theih a ni - Milan aia team nem zawk Bologna hneh theih an inbeisei dawn.

Liverpool hian team ṭha tia chhal ngam Bayer Leverkusen leh champion lai Real Madrid an la hmachhawn dawn a, hei vang hian Arne Slot-a tan match hmasa pahniha chak hi round of 16 luh nan a pawimawh ang.

Thawhlehna

Liverpool-in an league match hmasa pathumah a zawnin hnehna an chang a, mahse, rin loh takin Nottingham Forest chu Anfield-ah ngei 1-0 in an ngam lo. A tira fak hlawh Slot-a'n dem a hlawh nghal a, elpui club ṭantuten fiamthu thawh nan an hmang.

Mahse, Dutch coach a kun rei lo. Forest laka an tlawm hnuah league match hnih khelin an chak ve ve a, Manchester City an chetsual bawk avangin table chung ber an luah zui.

Reds hian league match kar lakah League Cup khelin, West Ham chu 5-1 ngawtin an sawp a, Champions League-ah AC Milan an hneh bawk. Forest laka an tlawm hnuah match li khelin an chak vek tihna a ni - an insiamṭha rang hle.

Insingsak hun?

Liverpool-in zaninah Champions League an khel ang a, Inrinni zanah league match khel turin Crystal Palace an mikhual zui ang. An dinhmun thlirin Slot-a'n player a siksawi nual a rinawm a, league lama lang tam lote an inlan a rinawm.

Chuti a nih chuan damlohna avanga Wolverhampton Wanderers hmachhawn thei lo Darwin Nunez chu bul ṭan tura beisei a ni a, Cody Gakpo pawhin bench luahlum reng a duh lo ang - Luis Diaz leh Diogo Jota tan hahchawlhna hun ṭha a ni dawn tihna a ni.

Wolves lakah Andy Robertson-a'n hliam tenau a nei a, a aia lut turin Konstantinos Tsimikas a awm. Slot-a hnuaiah Ryan Gravenberch-a'n season duhawm tak a hmang a, Dutch midfielder hi a chawl hahdam a nih chuan a aia lut turin Wataru Endo an nei.

Bolgona hi

1964-65 season hnua a vawi khat nan Bologna-in European football-a club inelna sang ber an khel a, mahse, Champions League hruai thlengtu Thiago Motta-a'n Juventus a pan san - an coach hi Fiorentina aṭanga an lakluh Vincenzo Italiano a ni.

Vincenzo hian Europa Conference League final (vawi hnih) leh Coppa Italia final-ah Fiorentina a hruai thleng a, mahse, an chak zo lo vek! Serie A lama match ruk an khelh tawhah vawi khat chiah la tlawm mah se, vawi khat chiah an la chak a, vawi li an draw.

Hei vang hian an tan Anfield-a chak beisei ngam a harsa a, Forest chak tawhna hmun tih erawh an inhrilh ang. CL-a an match hmasa berah Shakhtar Donetsk chu 0-0 in an inhnehtawkpui a, vawi 17 shot an nei - Reds lakah chuan chance neih chhun chhawr a ṭul ang.