Real tan Courtois inlan thei dawn lo

Thibaut Courtois a inhliam leh ta - Real Madrid keeper hi Madrid derby-a Atletico Madrid nen an inkhelh ṭumin a khel bawrah a inhliam a, zanin dar 12:30 Champions League match-a LOSC Lille an lenchilh hunah a inlan thei dawn lo.

Belgian keeper inlan theih loh zarah Ukraine international Andriy Lunin tan hun ṭha a inhawng dawn a, tun season-a la inlan lo keeper hian Lille lakah si ban a nghak ang - Courtois hian tun season-a Real match 10-ah inkhel bul a ṭan vek!

Kum 32 mi Courtois hian season hmasa kha khup hliam vangin a khel meuh lo a, inelna hrang hrangah match nga chiah a inlan. Real hian Inrinni zanah league match khel turin Villarreal an mikhual zui dawn a, international break-in a zui ang.

Hetihlai hian European champion tan chanchin lawmawm hriat tur a awm tho a, an league match hnuhnung bera malpui hliam vanga Atletico Madrid hmachhawn thei lo striker Kylian Mbappe chu a hliam a dam tawh. Coach Carlo Ancelotti-a'n a duh chuan a chhawr thei dawn.

Kum 25 mi Mbappe hian tun season inelna hrang hrangah match kua khelin goal sarih a khung leh der tawh a, French football-a a lo hmachhawn fo tawh Lille lakah hian inlan a châk ang.

Real hian tun season-a an Champions League match hmasa berah VfB Stuttgart chu 3-1 in an hneh a, Lille erawh Sporting Lisbon lakah 2-0 in an tlawm thung.